Bu ayın əvvəlində Rusiya müxalifətinin önəmli fiqurlarından keçmiş siyasi məhbus Vladimir Kara-Murza “Müharibə əleyhinə komitə”dən çıxıb.
Musavat.com xəbər verir ki, Rusiya müxalifətinin AŞPA-dakı potensial nümayəndə heyətinin üzvləri ilə görüş zamanı baş verən münaqişə fonunda “Azad Rusiya Forumu”nun rəhbəri və eyni zamanda “Müharibə əleyhinə komitə”nin iştirakçısı olan Harri Kasparov Kara-Murzanı komanda işindən yayınmaqda ittiham edib.
Kasparov bildirib ki, Kara-Murza ümumi müzakirəni kənara qoyaraq AŞPA prezidenti Yuliya Navalnaya və İlya Yaşini özü ilə aparıb. Kara-Murza isə yazıb ki, “siyasi mübarizədə kobudluq və alçaq şəxsi təhqirləri yolverilən üsul sayan Harri Kasparovla” eyni təşkilatda olmaq istəmir.
Dekabrın 14-də Kasparov İvan Tyutrinlə (hər ikisi “Azad Rusiya Forumu”nun iştirakçısıdır) söhbətində platformada iştirakın Berlin Bəyannaməsinə imza atmadan mümkün olmadığını, Kara-Murzanın isə bu imzadan hər vəchlə yayınmağa çalışdığını deyib. Onların sözlərinə görə, keçmiş siyasi məhbus nümayəndə heyətinin rəhbəri postuna (Tyutrinin iddiasına əsasən, “ömürlük”) təyin olunmasını lobbiləşdirməyə cəhd edib; bu barədə ona guya ukraynalı diplomatlar məlumat veriblər.
Dünən axşam Kara-Murza “Dojd” telekanalının jurnalisti Yekaterina Kotrikaadze və aparıcı Aleksandr Plyuşevin təklif etdiyi Kasparovla debatlara münasibət bildirib. O deyib ki, Kasparov “kobud üslubuna” görə üzr istədikdən sonra debatlarda iştirak etməyə hazırdır. Bu açıqlamaya şərh verən Maksim Kats həmkarından “bu uşaq oyunlarını dayandırmağı” xahiş edib.
Daha sonra “Müharibə əleyhinə komitə”nin digər üzvü Marat Gelman qeyd edib ki, üç il ərzində nümayəndə heyəti ilə bağlı müzakirələrdən birində müxalifətin dörd əsas təşkilatı olduğu göstərilib: onlardan ikisi ictimai (yəni qeyri-kommersiya) qurumdur — “Müharibə əleyhinə komitə” və “Azad Rusiya Forumu”, qalan ikisinin üzvləri isə fəaliyyətlərinə görə maaş alırlar (Free Russia Foundation və FBK). Gelman həmçinin yazıb ki, ukraynalı deputatlar platformada yalnız Ukraynanın tərəfində açıq mövqe tutan şəxslərin iştirak etməsində israr ediblər.
“Müharibə əleyhinə komitə” Kara-Murzanın çıxışından təəssüfünü ifadə edərək baş verənləri şəxsi münaqişə kimi qiymətləndirib və Berlin Bəyannaməsinə uyğun olaraq bu cür məsələləri ictimai müstəviyə çıxarmamağa çalışdıqlarını bildirib (Kara-Murza həmin bəyannaməni imzalamayıb). Komitənin fikrincə, Free Russia vəziyyətdən “Avropa siyasətçiləri ilə Rusiya demokratik qüvvələrinin ümumi platformasının yaradılmasını” pozmaq üçün istifadə edir və rəqiblərinin guya cinayət fəaliyyəti ilə bağlı “bilə-bilə yalan” eyhamlar səsləndirir. Təşkilat tərəfləri təmkinə çağırıb və AŞPA prosedurları çərçivəsində “demokratik və müharibə əleyhinə hərəkatın tanınmış simalarının geniş dairəsinin” iştirakını dəstəklədiyini bəyan edib.
Free Russia Foundation cavab olaraq bildirib ki, 2022-ci ildən AŞPA rəhbərliyi ilə danışıqlarda iştirak edir və “Xodorkovski strukturları”nı açıq və şəffaflıqdan konkret şəxslərin maraqları naminə imtina etmək niyyətində, həmçinin qərarların kulis arxasında qəbul olunmasında ittiham edir (burada “Müharibə əleyhinə komitə” və “Azad Rusiya Forumu” nəzərdə tutulur).
Fond AŞPA-nın “əsas prinsiplərini” - Ukrayna, Gürcüstan və Moldovanın ərazi bütövlüyünün tanınmasını, Ukraynaya qarşı “təcavüz cinayəti” üzrə tribunalın yaradılmasını və reparasiyaların ödənilməsini - bölüşdüyünü vurğulayıb və AŞPA-da FBK-nın, “Memorial”ın, “müstəqil media, ekspert təşkilatları və vətəndaş cəmiyyəti nümayəndələrinin” iştirakını dəstəklədiyini bildirib.
Bundan sonra Mixail Xodorkovski bəyan edib ki, Free Russia Foundation ondan “faydalı iş üçün” qrant alıb, lakin əslində “ABŞ Dövlət Departamentinin pullarını paylayan struktur”dur və “AŞPA-da avropalı parlamentarilərə nə etməli olduqlarını diktə etməyə” çalışır.
Musavat.com
