ABŞ prezidenti Donald Tramp Suriya hökumətinin işindən razıdır.
Musavat.com xəbər verir ki, o, Truth Social hesabında Dəməşq hökumətini tərifləyib və Suriya ilə İsrail arasında dinc yanaşı yaşamağı səbirsizliklə gözlədiyini bildirib: “ABŞ Suriya hökumətinin zəhmətli və qətiyyətli işinin nəticələrindən çox məmnundur. Biz Suriya hökumətinin çiçəklənən bir ölkə qurmaq üçün vacib olan işləri davam etdirməsini təmin etmək üçün əlimizdən gələni edirik".
Tramp həmçinin Suriya ilə İsrail arasında güclü və açıq dialoqun vacibliyini vurğulayıb: "Yeni Suriya Prezidenti Əhməd əl-Şaraa yaxşı nəticələrin təmin edilməsi və Suriya ilə İsrailin uzun və çiçəklənən münasibətlərinin olması üçün çox çalışır".
ABŞ Prezidenti qeyd edib ki, Suriyaya müsbət təsir göstərən amillərdən biri onun Dəməşqə qarşı sanksiyaları ləğv etmək qərarıdır.
Noyabr ayında Tramp Suriyanın inkişafına kömək etməyə hazır olduğunu bəyan edib. O, hazırkı Suriya liderini "ölkəsini çiçəkləndirməyə qadir lider" kimi təsvir edib: "İnanıram ki, bu lider bunu edə bilər".
Musavat.com
