ABŞ prezidenti Donald Tramp Ermənistanın baş naziri Nikol Paşinyana Qəzza ilə bağlı yaradılması nəzərdə tutulan “Sülh Şurası”na qoşulmaq üçün rəsmi dəvət göndərib.
Musavat.com xəbər verir ki, bu barədə Ermənistan hökumət başçısının mətbuat katibi Nazeli Baqdasaryan açıqlama verib.
Onun sözlərinə görə, dəvət diplomatik kanallar vasitəsilə rəsmi şəkildə göndərilib və Ermənistan tərəfindən qəbul olunub. Baqdasaryan bildirib ki, İrəvan Qəzza ətrafında yaranmış humanitar və siyasi böhranın həllinə yönəlmiş beynəlxalq təşəbbüslərdə iştirak etməyə hazırdır.
Məlumata görə, Trampın təşəbbüsü ilə formalaşdırılan “Sülh Şurası” Yaxın Şərqdə, xüsusilə Qəzza zolağında münaqişənin nizamlanması, humanitar vəziyyətin yaxşılaşdırılması və mümkün siyasi həll mexanizmlərinin müzakirəsi üçün nəzərdə tutulub. Şuraya bir sıra ölkə liderlərinin və hökumət başçılarının dəvət olunduğu bildirilir.
Musavat.com qeyd edir ki, Paşinyanın bu formata qoşulması Ermənistanın regional və beynəlxalq proseslərdə daha fəal görünmək istəyi kimi qiymətləndirilir. Ekspertlərin fikrincə, İrəvan bu addımla həm Qərblə münasibətləri möhkəmləndirməyə, həm də beynəlxalq platformalarda öz mövqeyini gücləndirməyə çalışır.
Qeyd edək ki, bundan əvvəl Özbəkistan prezidenti Şavkat Mirziyoyevin də Trampın təklifi ilə “Sülh Şurası”na dövlət-təsisçi qismində qoşulmağa hazır olduğu açıqlanmışdı. Bu isə Qəzza məsələsi ətrafında yeni və geniş beynəlxalq diplomatik formatın formalaşdığını göstərir.
Musavat.com
Trampdan İrəvana rəsmi dəvət: Paşinyan Qəzza üzrə “Sülh Şurası”na qoşulur
Bizim partnyorlarımız
XƏBƏR LENTİ
