Ukrayna prezidenti Volodimir Zelenski bildirib ki, Avropanın birləşmiş ordusunun formalaşdırılmasının əsasını təxminən bir milyon ukraynalı hərbçi təşkil edə bilər. Bu barədə o, çıxışı zamanı danışıb.
Musavat.com xəbər verir ki, Zelenskinin sözlərinə görə, Avropanın vahid silahlı qüvvələrinin yaradılması 3–5 il perspektivində real görünür və bu, ilk növbədə Avropa ölkələrinin siyasi iradəsindən və operativ qərar qəbul etmək bacarığından asılı olacaq.
Zelenski vurğulayıb ki, Ukrayna ordusu olmadan, müharibə təcrübəsinə malik demək olar ki, bir milyon ukraynalı hərbçi olmadan Avropanın birgə müdafiə qüvvələrinin yaradılması mümkünsüzdür. Onun sözlərinə görə, məhz Ukrayna faktiki olaraq Rusiya hərbi maşınının qarşısını alan “semafor” rolunu oynayıb.
“Ukrayna Rusiya hərbi maşınını dayandıran əsas qüvvəyə çevrilib. Lakin qırmızı işıq əbədi olaraq yanmaz – bizə davamlı və real dəstək lazımdır”, – deyə Zelenski bildirib.
Ekspertlər hesab edirlər ki, bu açıqlama Avropa təhlükəsizlik arxitekturasında köklü dəyişikliklərə hazırlığın siqnalıdır və Ukraynanın gələcəkdə qitənin hərbi-siyasi sistemində mərkəzi rol oynaya biləcəyini göstərir. Bu isə həm NATO daxilində, həm də Avropa İttifaqı çərçivəsində ciddi müzakirələrə yol aça bilər.
Musavat.com
