Yeni iş modelləri əmək bazarında sürətlə yayılmaqda davam edir.
Musavat.com xəbər verir ki, hibrid iş rejimində tətbiq olunan və iş gününü qısa, intensiv mərhələlərə bölən “mikrosmena” modeli getdikcə daha effektiv hesab olunur.
Bu modelə əsasən, iş günü 45–90 dəqiqəlik yüksək fokus tələb edən dövrlərə bölünür. Gün ümumilikdə 14–16 saata yayılsa da, fasilələrlə işləmək əməkdaşların həm fiziki, həm də psixoloji baxımdan tükənməsinin qarşısını alır. Yanaşma pandemiya dövründə formalaşıb və klassik 8 saatlıq fasiləsiz iş rejiminə alternativ kimi ortaya çıxıb.
Mütəxəssislərin fikrincə, mikrosmenalar işçilərin təbii diqqət və enerji piklərinə uyğun işləməsinə imkan yaradır. Bu da xüsusilə nahardan sonrakı məhsuldarlıq azalmasını aradan qaldırır, işin keyfiyyətini və səmərəliliyini artırır.
İşəgötürənlərin məlumatlarına görə, işçilərin təxminən 65 faizi bu cür çevik qrafikdə işləməyə maraq göstərir. Xüsusilə menecerlər, ailə üzvlərinə qulluq edən şəxslər və əlavə işi olan əməkdaşlar arasında bu modelə maraq daha yüksəkdir.
Ekspertlər hesab edirlər ki, mikrosmena yanaşması yaxın illərdə ənənəvi iş günü anlayışını kökündən dəyişə və əmək bazarında yeni iş mədəniyyəti formalaşdıra bilər.
Musavat.com
