Çinli turistləri daşıyan UAZ Baykal gölündəki Xoboy burnu yaxınlığında buzun altına düşüb.
Musavat.com xarici mediaya istinadla xəbər verir ki, ilkin məlumatlara görə, nəqliyyat vasitəsindəki doqquz nəfərdən yalnız biri xilas ola bilib; qalan sərnişinlər və sürücü həlak olub. Xilasedicilər yeddi nəfərin cəsədini tapıblar. İstintaq Komitəsi cinayət işi açıb və prokurorluq araşdırmaya başlayıb.
Hadisə bu gün günortadan sonra baş verib.
İrkutsk vilayəti üzrə Fövqəladə Hallar Nazirliyinin mətbuat xidmətinin məlumatına görə, xilasedicilər nəqliyyat vasitəsinin çökmə yerini müəyyən ediblər.
"Turistləri daşıyan UAZ avtomobili hərəkətdə olarkən üç metr enində buz yarığına düşüb. Hadisə yerində dərinlik 18 metrdir. Xilasedicilər sualtı tədqiqat aparıblar. Yeddi nəfərin cəsədi tapılıb. Dalğıc əməliyyatları planlaşdırılır", - deyə nazirlik əlavə edib.
İrkutsk vilayətinin qubernatoru İqor Kobzev hadisəni faciə adlandırıb. O bildirib ki, nəqliyyat vasitəsində Çindən gələn xarici turistlər olub. O, TASS-a verdiyi müsahibədə səkkiz turistdən dördünün Rusiyaya öz xətləri ilə gəldiyini dəqiqləşdirib.
"İlkin məlumatlara görə, dörd turist müstəqil şəkildə gəlib. Bizim Çinlə vizasız rejimimiz var. Hüquq-mühafizə orqanları məsələni araşdırır", - deyə regional qubernator bildirib.
Onun sözlərinə görə, qalan turistlərin rəsmi qeydiyyata alınıb-alınmadığı hələlik məlum deyil. Hadisə ilə bağlı artıq İrkutskdakı Çin baş konsulluğuna məlumat verilib. Regional qubernator həmçinin xatırlatdı ki, Olxon adasına gedən buz keçidi hazırda bağlıdır və buz üzərində avtomobil idarə etmək qadağandır.
Musavat.com
