Vəkillik hər zaman yüksək məsuliyyət, prinsipiallıq və fədakarlıq tələb edən bir peşə olub.
Musavat.com xəbər verir ki, bu fikirləri bu gün Kollegiyanın sədri Anar Bağırov Vəkillər Kollegiyasının təntənəli mərasimində çıxışı zamanı deyib.
O bildirib ki, cəmiyyətin ədalətə olan inamının formalaşmasında vətəndaşla dövlət arasında hüquqi körpü rolunu məhz vəkillər oynayır. Bu baxımdan, bu gün and içən hər bir həmkarımız yalnız peşə fəaliyyətinə başlamır, eyni zamanda böyük bir etimadı və ağır məsuliyyəti öz üzərinə götürür.
“Cari il Azərbaycan üçün xüsusi rəmzi və tarixi məna daşıyır. 2025-ci il “Konstitusiya və Suverenlik İli” kimi qeyd olunur. Eyni zamanda xalqımızın tarixində yeni bir mərhələnin başlanğıcı olan Vətən müharibəsində qazanılmış Şanlı Zəfərin 5-ci ildönümünü qeyd edirik. Bu Zəfər yalnız ərazi bütövlüyümüzün bərpası deyil, həm də dövlət suverenliyimizin hüquqi əsaslarının möhkəmləndirilməsi, Konstitusiyamızın bütün ərazilərimizdə tam və maneəsiz tətbiqinin təmin olunması deməkdir. Məhz bu kontekstdə hüququn aliliyinin, ədalətin və insan hüquqlarının təminində vəkillik institutunun rolu daha aydın şəkildə ön plana çıxır. Vətəndaşların keyfiyyətli hüquqi yardıma çıxışının təmin edilməsi, müdafiə hüququnun effektiv icrası və məhkəmə icraatında tərəflərin bərabərliyinin qorunması tam müstəqil vəkillik fəaliyyətinin konstitusion əsasını və cəmiyyətdəki əhəmiyyətini bir daha təsdiqləyir”.
A.Bağırov bildirib ki, Post-sovet məkanında vəkillik institutuna müstəqillik verən ilk dövlətlərdən biri Azərbaycan olub:
“Ümummilli Lider Heydər Əliyev tərəfindən 28 dekabr 1999-cu ildə “Vəkillər və vəkillik fəaliyyəti haqqında” Qanun imzalanmış, Azərbaycan tarixində ilk dəfə vəkillik tam müstəqil, hakimiyyətin heç bir qolundan asılı olmayan bir təsisat kimi formalaşıb.
Azərbaycanda vəkillik institutunun inkişafı və nüfuzunun artırılması istiqamətində qəbul edilmiş çoxsaylı normativ-hüquqi aktlar və islahatlar Ulu Öndərin layiqli davamçısı, möhtərəm cənab Prezident İlham Əliyevin adı ilə də birbaşa bağlıdır. Prezidentin 3 aprel 2019-cu il tarixli “Məhkəmə-hüquq sistemində islahatların dərinləşdirilməsi haqqında” Fərmanı bu baxımdan xüsusi strateji əhəmiyyətə malikdir. Həmin Fərmanla dövlət hesabına göstərilən hüquqi yardıma görə vəsaitin birbaşa Vəkillər Kollegiyasına ayrılması vəkilliyin institusional müstəqilliyinin gücləndirilməsinə əsaslı töhfə verib”.
Kollegiya sədri vurğulayıb ki, 2025-ci ildə vəkillərə ödənilən haqqın saatda 6 manatdan 11 manata qaldırılması bu siyasətin ardıcıl davamının bariz nümunəsidir.
“Qeyd edim ki, 2025-ci il üzrə 34.073 qərar üzrə 5.999.874,51 manat məbləğ vəkillərə ödənilib. Növbəti il üçün isə dövlət büdcəsindən ödənişsiz hüquqi yardım üçün isə 9 milyon manat pul ayrılıb. Bu proseslərin həyata keçirilməsində Kollegiyanın Hüquqi Yardım Mərkəzinin rolu danılmazdır”.
Şahanə Rəhimli
Musavat.com
