Rusiyada vətəndaşlar ilk dəfə olaraq təkcə mağazalardakı alışları deyil, həm də kommunal və digər müntəzəm ödənişləri hissə-hissə ödəmək imkanı əldə ediblər. T-Bank “Hissə-hissə” xidmətini bütün nağdsız ödəniş üsullarına inteqrasiya edir.
Musavat.com xəbər verir ki, yeni mexanizmə əsasən, ödəniş zamanı məbləği dərhal dörd hissəyə bölmək mümkün olacaq. Bu imkan təkcə alış-verişə deyil, həm də mənzil-kommunal xidmətlər (JKU), təhsil haqqı, internet, oyunlar və digər müntəzəm ödənişlərə şamil edilir.
Xidmət artıq T-Bankın debet kartı ilə ödənişlərdə, Android telefonlarda T-Pay vasitəsilə, bankın mobil tətbiqində aparılan ödənişlərdə, həmçinin Sberbankın QR-kodu və Sürətli Ödəniş Sistemi (SBP) üzərindən – həm onlayn, həm də oflayn rejimdə əlçatan olur. 2026-cı ilin əvvəlindən etibarən xidmətin T-Bank terminallarında və onlayn mağazalarda T-Pay düyməsi vasitəsilə də istifadəyə verilməsi planlaşdırılır.
Xidmətin baş icraçı direktoru Maksim Zaytsevin sözlərinə görə, bu inteqrasiya bazarı dəyişir və istifadəçilərə mağazada, QR-kodla və tətbiqdaxili ödənişlərdə hissə-hissə ödəmə üçün vahid və eyni mexanizm təqdim edir. Xidmətin parametrləri T-Bankın mobil tətbiqində tənzimlənə bilər.
