Rusiyanın Ukraynanın şərqində irəliləməkdə çətinlik çəkməsi və daxili dəstəyin zəifləməsi fonunda, Kreml rəhbərliyi özünün ən yaxın müttəfiqi olan Belarusa təzyiqləri kəskin şəkildə artırıb.
Musavat.com xəbər verir ki, ABŞ-ın nüfuzlu "The Wall Street Journal" (WSJ) qəzetinin hazırkı və keçmiş avropalı rəsmilərə istinadən yaydığı məlumata görə, Rusiya Prezidenti Vladimir Putin Belarus diktatoru Aleksandr Lukaşenkonu maliyyə yardımlarını kəsməklə şantaj edərək, onu Ukraynaya qarşı müharibədə "ikinci cəbhə" açmağa məcbur edir. Kəşfiyyat hesabatlarına əsasən, Moskvanın Minsk qarşısında qoyduğu əsas eskalasiya tələblərinə ilk növbədə Belarus ərazisindən Ukraynaya qarşı irimiqyaslı "Şahid" dronları ilə zərbələrin endirilməsi daxildir.
Bununla yanaşı, Kreml cəbhə xəttini qərb istiqamətinə doğru genişləndirməklə Ukrayna Silahlı Qüvvələrinin diqqətini və hərbi resurslarını şərqdəki prioritet mövqelərdən yayındırmağı hədəfləyir.
Qəzet yazır ki, Putinin digər təhlükəli planı isə Belarusu qonşu NATO üzvü olan ölkələrə qarşı qeyri-ənənəvi hibrid əməliyyatlara və təxribatlara birbaşa cəlb etməkdir. Ekspertlər qeyd edirlər ki, taktiki nüvə silahlarına ev sahibliyi edən Belarusun müharibəyə birbaşa qoşulması Lukaşenkonun strateji maraqlarına zidd olsa da, Kremlin iqtisadi və siyasi təzyiqləri qarşısında Minskin manevr imkanları getdikcə daralır.
Musavat.com
