Musiqi platforması Spotify qeyri-adi məhsulla gündəmə gəlib.
Musavat.com xəbər verir ki, şirkət pank üslublu su brendi Liquid Death ilə birlikdə Eternal Playlist Urn adlı dəfn urnası təqdim edib. Ağ rəngli urnanın qapağına Bluetooth-kolonka yerləşdirilib və istifadəçilərə “əbədiyyət üçün pleylist” hazırlamaq təklif olunur.
Layihə çərçivəsində platforma istifadəçilərə bir sıra suallar ünvanlayır: “Sənin əbədiyyətinin ab-havası necədir?”, “Ruhunun imza səsi nədir?” Cavablara uyğun olaraq fərdi musiqi siyahısı formalaşdırılır.
Məhsul məhdud saydadır – cəmi 150 ədəd istehsal edilib və yalnız ABŞ-da satışa çıxarılıb. Qiyməti isə 495 dollar təşkil edir.
Şirkətin təqdimat mətnində diqqətçəkən ifadə də yer alıb: “Həyat musiqiyə ehtiyac duyur. Eyni şey axirət üçün də keçərlidir.”
Musavat.com
