Putinin qardaşı qızı Anna Tsivilyevanın rəhbərlik etdiyi “Vətən Müdafiəçiləri” fondu 2026–2028-ci illərdə dövlət büdcəsindən təxminən 50 milyard rubl alacaq.
Musavat.com xarici agentliklərə istinadən xəbər verir ki, bu barədə məlumat Dövlət Dumasının açıqlamasında yer alıb — 18 noyabrda federal büdcə layihəsi ikinci oxunuşda qəbul edilib.
İlkin olaraq ayrılacaq məbləğ daha az olub, lakin “Vahid Rusiya” fraksiyası vəsaitin 7,7 milyard rubl artırılmasını təklif edərək bildirib ki, əlavə maliyyə Ukraynaya qarşı müharibədə iştirak edən 400 min nəfərə dəstək üçün zəruridir.
Fond 2023-cü ilin aprelində yaradıldığından bəri dövlət ona artıq böyük vəsait ayırıb: 2024-cü ildə 25 milyard rubl, 2023–2024-cü illərdə isə əlavə 28 milyard rubl. Bu barədə baş nazirin müavini Tatyana Qolikova məlumat vermişdi. Təşkilat müharibə iştirakçılarına və onların ailələrinə hüquqi yardım, sənədləşmə, müalicə, reabilitasiya, işə düzəlmə və digər sosial məsələlər üzrə dəstək göstərir. 2024-cü ilin yazından etibarən fondun fəaliyyəti itkin düşmüş hərbçilərin ailələrinə də şamil olunub.
“Vətən Müdafiəçiləri”ndə 3800-dən çox sosial koordinator çalışır. Fondun hesabatlarına görə, iki il ərzində iki milyondan çox müraciət emal olunub, 175 mindən çox hərbçi tibbi yardım alıb.
Bununla belə, müharibə iştirakçıları fondun xidmətlərinin keyfiyyətindən mütəmadi olaraq şikayətlənirlər: bəzilərinin sözlərinə görə, “hüquqi yardım” əslində internetdən tapılmış məsləhətlərin təkrarlanmasından ibarətdir və zəruri sənədlər hazırlanıb təqdim olunmur. “Vaqner” özəl hərbi şirkətinin keçmiş döyüşçüləri də kobud münasibət və yaralanmalarına, həmçinin dövlət təltiflərinə baxmayaraq dəstəyin rədd edilməsi barədə məlumat veriblər.
Musavat.com
