ABŞ prezidenti Donald Tramp Federal Ehtiyat Sistemi(FED) rəhbərliyinə iki əsas namizədini açıqlayıb.
Musavat.com xəbər verir ki, bunlar Ağ Evin Milli İqtisadi Şurasının rəhbəri Kevin Hassett və FED-in keçmiş İdarə Heyəti üzvü Kevin Uorşdur.
Tramp The Wall Street Journal (WSJ) qəzetinə verdiyi müsahibədə bu barədə danışıb: "Düşünürəm ki, ən yaxşı iki namizəd Kevin Uorş və Kevin Hassettdir. Hər iki Kevin əladır". O, əlavə edib ki, "bir neçə başqa əla" namizəd də var.
Qəzetin məlumatına görə, dekabrın 10-da Amerika lideri Uorşla 45 dəqiqəlik müsahibə keçirib və namizəddən FED sədri təyin olunacağı təqdirdə faiz dərəcəsinin endirilməsini dəstəkləyəcəyinə inanıb-inanmadığını soruşub.
Tramp ümid edir ki, bir il ərzində FED-in faiz dərəcəsi - hazırkı 3,5-3,75 faizdən 1 faiz və ya daha aşağı olacaq. Prezident hesab edir ki, növbəti FED sədri bu məsələ ilə bağlı onunla məsləhətləşməlidir.
Musavat.com
