Ukrayna Silahlı Qüvvələri Rusiya Federasiyasının dərinliklərində yerləşən Volqoqrad şəhərinə yerli istehsal olan qanadlı raketlərlə güclü və strateji zərbə endirib.
Musavat.com xəbər verir ki, hərbi prosesləri yaxından izləyən "Exilenova+" monitorinq kanalının yaydığı təcili məlumata görə, bu hücum zamanı ilk dəfə Ukraynanın öz hərbi-sənaye potensialı hesabına istehsal etdiyi yeni "Flamingo" qanadlı raketlərindən kütləvi şəkildə istifadə olunub. Həyata keçirilən raket hücumunun əsas hədəfi kimi Rusiyanın müdafiə sənayesində mühüm rol oynayan obyekt seçilib.
Mənbələr qeyd edir ki, zərbələr birbaşa Rusiyanın hərbi-sənaye kompleksinin ən aparıcı və strateji müəssisələrindən biri hesab olunan məşhur "Barrikadı" zavoduna dəyib. Sözügedən zavod Rusiya ordusu üçün ağır artilleriya, raket texnikası və digər mühüm hərbi təyinatlı məhsulların istehsalı ilə məşğul olan əsas qapalı mərkəzlərdən biridir. Hücumun müəssisəyə vurduğu real ziyanın miqyası və itkilər barədə hələlik rəsmi açıqlama verilməsə də, hərbi ekspertlər bu hadisəni Ukrayna raket sənayesinin uzaq məsafədəki hədəfləri məhv etmək baxımından yeni bir mərhələyə keçməsinin göstəricisi kimi dəyərləndirirlər.
Musavat.com
