Dövlət Duması altı ay-bir il ərzində Rusiyada YouTube-un tamamilə bloklanacağını elan edib və istifadəçilərə Rutube və VK Video-ya keçməyi məsləhət görüb.
Musavat.com xarici mediaya istinadla xəbər verir ki, Dövlət Dumasının informasiya siyasəti komitəsinin sədr müavini Andrey Svintsovun sözlərinə görə, YouTube tənzimləyici tələbləri qulaqardına vuraraq Rusiya qanunlarını pozmağa davam edir. O, kontent yaradıcılarının mümkün qədər tez Rutube və VK Video kimi yerli platformalara keçməli olduqlarını vurğulayıb.
Rusiyada YouTube-a daxil olmaqda problemlər 2024-cü ilin yayında, istifadəçilər xidmətdə kəskin yavaşlama müşahidə etdikdə başlayıb. “Roskomnadzor” əvvəlcə bunu Google-ın infrastrukturu ilə bağlı texniki çətinliklərlə əlaqələndirib. Lakin sonradan məhdudiyyətlərin qəsdən edildiyi məlum olub. Dövlət Dumasının keçmiş deputatı Aleksandr Xinşteyn yavaşlamanın Rusiya hakimiyyəti tərəfindən təşkil edildiyini təsdiqləyib.
Hələ 2024-cü ilin dekabr ayında ölkənin ən böyük mobil operatorları - MTS, Beeline, MegaFon, Tele2 və Yota - platformada video izləməyi effektiv şəkildə bloklayıblar. “Roskomnadzor” rəsmi olaraq YouTube-a girişin sistematik pozuntular və təbliğat hesab etdiyi 200-dən çox Rusiya kanalının silinməsi səbəbindən məhdudlaşdırıldığını açıqlayıb.
Musavat.com
