Avstraliyada iki dost tualetin daşınmasına görə tələb olunan 2 min Avstraliya dollarından çox pulu ödəməmək üçün qeyri-adi yola əl atıb.
Musavat.com xəbər verir ki, ABC-nin məlumatına görə, Aleks Kreyq və Pol Qrəm Kenquru adasına tualetin daşınması üçün yüksək məbləğ ödəmək əvəzinə özləri kiçik bərə hazırlayıblar. Onlar həyət tualetini və manqal avadanlığını bərəyə yerləşdirərək Cervis burnu ilə Kenquru adası arasındakı təhlükəli boğazı dəniz yolu ilə keçiblər.
Təxminən dörd saat davam edən səfər zamanı dostlar marşrutu yaxşı tanıdıqları üçün riski əvvəlcədən hesablayıblar. Onlar küləyin səngiməsini, dalğaların sakitləşməsini və axının dəyişməsini gözlədikdən sonra yola çıxıblar. Yolboyu isə qabırğa əti və kolbasa bişirərək piknik də ediblər.
Onların sözlərinə görə, bu fikir ilk baxışdan dəli görünə bilərdi, lakin hər detal diqqətlə planlaşdırılmışdı. Nəticədə tualet salamat şəkildə adaya çatdırılıb və minlərlə dollar qənaət edilib.
Musavat.com
