Milli Məclisin bu gün keçirilən plenar iclasında çıxış edən deputat Siyavuş Novruzov minatəmizləmə ilə məşğul olan işçilərin sosial müdafiəsi haqqında danışıb.
Musavat.com-un məlumatına görə, deputat minatəmizləmə işi ilə məşğul olan şəxslərin sosial müdafiəsi, sağlamlığı və pensiya təminatı məsələlərindən bəhs edib:
“Bu, ən çətin və ən təhlükəli peşələrdən biridir. Bu insanlar hər gün ölümlə üz-üzə qalır. Ona görə də istifadə olunan texnika müxtəlif dövrlərdə gəlir və gömrük vergilərindən azad edilib”.
Komitə sədri bildirib ki, bu sahədə çalışan insanların da vergilərdən azad olunması və ya onlara əlavə güzəştlərin verilməsi, əməkhaqlarının artırılması yerində olardı:
“Çünki onların pensiyaları yüksək deyil, aldıqları xəsarətlərə görə sonradan ödənilən kompensasiyalar da kifayət qədər böyük məbləğdə nəzərdə tutulmur. Bu sahədə çalışan insanlara diqqətin artırılması vacibdir. Təkcə işğaldan azad olunmuş ərazilərdə deyil, Fövqəladə Hallar Nazirliyində və Azərbaycanın digər bölgələrində mina təmizləmə və sursatla bağlı gündəlik təhlükəli işlərə cəlb olunan şəxslərin pensiyaları aşağıdır, sosial müdafiələri isə lazımi səviyyədə deyil”.
E.Paşasoy,
Musavat.com
