Google Android əməliyyat sistemində ciddi təhlükəsizlik problemi aşkar etdiyini açıqlayıb.
Musavat.com xəbər verir ki, şirkət sistemdə ümumilikdə 124 təhlükəsizlik boşluğu müəyyən edib və onların aradan qaldırılması üçün təcili yeniləmə yayımlayıb. Mütəxəssislər bütün Android istifadəçilərinə telefonlarını ən son versiyaya yeniləməyi və cihazı yenidən başlatmağı tövsiyə edirlər.
Məlumata görə, ən böyük risk "CVE-2025-48595" kodlu təhlükəsizlik boşluğu ilə bağlıdır. Bu boşluq "zero-day" (sıfır gün) zəifliyi kimi qiymətləndirilir və artıq kibercinayətkarlar tərəfindən aktiv şəkildə istifadə olunur.
Kibertəhlükəsizlik mütəxəssislərinin sözlərinə görə, sözügedən boşluq hücumçulara uzaqdan cihaza müdaxilə etmək, həssas məlumatları ələ keçirmək və hətta telefonu tamamilə yararsız vəziyyətə salmaq imkanı yarada bilər. Ən təhlükəli məqam isə odur ki, istifadəçinin hər hansı keçidə daxil olması və ya əlavə təsdiq verməsi tələb olunmur.
Google indiyədək neçə cihazın bu problemdən təsirləndiyini açıqlamasa da, təhlükəsizlik mütəxəssisləri zəifliyin müəyyən hədəflərə qarşı artıq istifadə edildiyini bildirirlər. Buna görə də Android istifadəçilərinə "Parametrlər" bölməsindən sistem yeniləmələrini yoxlamaq, ən son təhlükəsizlik paketini quraşdırmaq və telefonu söndürüb yenidən işə salmaq tövsiyə olunur.
Ekspertlər bildirirlər ki, yenidən başlatma prosesi və təhlükəsizlik yeniləmələrinin quraşdırılması cihazın mümkün hücumlardan qorunmasına kömək edə bilər.
Musavat.com
