İranın xarici işlər naziri Abbas Əraqçi xarici diplomatik missiyaların və beynəlxalq nümayəndəliklərin rəhbərləri ilə keçirdiyi görüşdə mühüm bəyanatlarla çıxış edib.
Musavat.com xəbər verir ki, nazir İsrailin Livana qarşı hər hansı hərbi fəaliyyətinin Tehran tərəfindən anlaşma memorandumunun şərtlərinin pozulması kimi qiymətləndiriləcəyini vurğulayıb.
XİN rəhbərinin bəyanatında yer alan digər mühüm məqamlar aşağıdakılardır:
ABŞ və İsrailin İrana qarşı hərbi hərəkətləri nəticəsində yaranan fikir ayrılıqları səbəbindən Tehran və Vaşinqton arasında razılığa gəlmə prosesi iki mərhələyə ayrılıb. Üç ay davam edən məsləhətləşmələrdən sonra iyunun 14-də danışıqların ilk mərhələsi tamamlanıb.
İlk mərhələdə tərəflər hərbi əməliyyatların dayandırılması, Hörmüz boğazındakı vəziyyət, dəniz yollarının blokadadan çıxarılması və müharibədən sonrakı bərpa məsələlərinə dair anlaşma memorandumu imzalayacaqlar. Tehrandakı yekun danışıqlardan sonra hərbi əməliyyatların dərhal və daimi olaraq dayandırılması barədə qərar qüvvəyə minib. Memorandumun bəndlərinin rəsmi icrasına isə cümə günündən başlanacaq.
Birinci mərhələ bitdikdən sonra 60 gün ərzində yekun sazişin hazırlanması üçün danışıqlar davam etdiriləcək. Yekun sənəddə nüvə proqramı və sanksiyaların ləğvi ilə bağlı qərarlar təsbit olunacaq.
İran Livanın cənubundakı münaqişəni öz təhlükəsizliyi ilə birbaşa bağlı hesab edir. Əldə olunmuş atəşkəs Livan cəbhəsinə də tam şamil olunur. Tehranın mövqeyinə görə, bu memorandumun tərəfləri bir tərəfdən ABŞ və İsrail, digər tərəfdən isə İran və "Hizbullah" hərəkatıdır.
Livanda münaqişənin tamamilə bitməsi İsrailin işğal etdiyi ərazilərdən geri çəkilməsini nəzərdə tutur. Qoşunlar çıxarılmadan sülh tənzimlənməsi tamamlanmış hesab edilə bilməz.
Nazir qətiyyətlə bildirib ki, İsrailin Livana qarşı hər hansı hərbi əməliyyatı və ya Livan ərazilərinə nəzarəti davam etdirməsi bundan sonra memorandumun şərtlərinin pozulması kimi qəbul ediləcək.
Musavat.com
