Bu, yerli satiriklərin Rusiyada yanacaq qıtlığına dair düzəltdiyi fotoşop məhsuludur, amma gerçəkliyi dəqiq ifadə edir.
Federasiyada fəaliyyət göstərən neft şirkətlərinin YDM-lərinin “tapança”ları bu gün RF-nin media qurumlarının mikrofonuna dönərək ölkə başçısından cavab gözləyir.
Onun cavabı isə yoxdur, daha dəqiqi, cavab “yoxdur” şəkilndədir və tam olaraq belədir: “Benzin yoxdur, dizel yanacağı yoxdur”.
Sankt-Peterburqdan İrkutska, Murmanskdan Soçiyə qədər Rusiyanın, demək olar ki, bütün bölgələrində yanacaq çatışmazlığı var.
Bəzi regionlarda bəzi YDM-lərdə yanacağın olduğu bildirilir, amma onlarda da uzun növbələrdir. Sürücülər öz avtomobillərini kilometrlərcə bir-birinin ardında saxlayıb, heç olmasa bir çən dolusu ( “polnu bak”) yanacaq alacaqlarını gözləyirlər. Bəri başdan bəllidir ki, sıranın ortasında və axırında olanlara yanacaq çatmayacaq.
Çünki istehsal minimuma enib, ardı ya gəlmir, ya da çox az gəlir. Ukrayna ordusunun dronları RF-də işləyən əksər neft emalı zavodlarını (NEZ) vurub, istehsal zəncirini qırıb. Bir çox NEZ-lərdə başlanmış yanğın istehsal seksiyalarının dərhal bərpasını mümkünsüz edib.
Heç demə, gücünə görə “dünyanın ikinci ordusu”na malik Rusiyanın “Axilles dabanı” məhz bu yanacaq təchizatı sektoru imiş. Ukrayna Rusiyanı o dabanından vurmaqdadır.
Bu, kiminsə ağlına ekspromt gələn ideya deyil. Bu, hərbi və mülki kəşfiyyatın, dərin analizlərin, hesablamaların nəticəsidir. Ukrayna və onun müttəfiqləri 4 illik qanlı müharibədən sonra Rusiyanın zəif yerini tapıblar və onu ardıcıl olaraq bu “yara”sının üstündən vururlar.
Xaricdən yanacaq idxalı yaranı sağaltmır. Üstəlik, Ukrayna dronları yanacaq daşıyan avto-tankerləri də vura bilər.
Əslində bu, təhlükəli gedişatdır. Divara sıxılan Rusiya son silahına ələ ata bilər. O “son silah”ın nə olduğunu hər kəs bilir.
Kimsə deyə bilməz ki, yox, Putin o addımı atmaz. Nə bilmək olar? “Müəmma dolu rus qəlbi”nə az-çox bələd olanlar bilir ki, o potensial onlarda var, son nəfəsdə “a nu-ka, maxnyom, bıla, ne bıla” deyə bilərlər.
Hələlik dövlət başçısı YDM “tapança”ları ilə üz-üzə qalıb.
Musavat.com
