Kremldə Rusiya Prezidenti Vladimir Putinlə ABŞ prezidentinin xüsusi nümayəndəsi Stiv Uitkoff arasında ötən gecə aparılan danışıqlarda ilk dəfə olaraq ABŞ Federal Satınalmalar Xidmətinin (FAS) komissarı Coş Qruenbaum da iştirak edib.
Musavat.com diplomatiyada yeni olan şəxsin kimliyi haqqında məlumatları oxuculara təqdim edir.
Coş Qruenbaumun dəqiq doğum tarixi və ili məlum deyil. Consulting.us saytının məlumatına görə, o, 2025-ci ildə 39 yaşında olub. Qruenbaum Nyu-Cersi ştatında yerləşən ortodoks yəhudi icmasında böyüyüb. Onun babası Holokostda bütün ailə üzvlərini itirib.
Bir neçə il yəhudi təhsili aldıqdan sonra Coş Qruenbaum biznes fəaliyyətinə ailəsinə məxsus ərzaq idxalı bazasından başlayıb. Daha sonra hüquq təhsili alıb və Nyu-York Universitetinin Biznes Məktəbində biznesin idarə edilməsi üzrə magistr dərəcəsinə yiyələnib. Ardınca dörd il Moelis investisiya bankında çalışıb, daha sonra isə KKR investisiya şirkətinə keçib.
Coş Qruenbaum qeyri-standart şəraitdə idarəetmə və kredit yönümlü özəl investisiyalar üzrə mütəxəssisdir. Onun peşəkar təcrübəsinə həmçinin restrukturizasiya prosesləri, birləşmə və satınalmalar, eləcə də KKR şirkətinin kredit strategiyaları çərçivəsində mürəkkəb məsələlərin həlli daxildir.
Ötən ilin yanvarında Donald Tramp ABŞ prezidenti olduqdan sonra onu Ümumi Xidmətlər Administrasiyasının tərkibində fəaliyyət göstərən Federal Satınalmalar Xidmətinin komissarı vəzifəsinə təyin ediblər.
Vəzifəsinin icrasına başladığı ilkin mərhələdə Coş Qruenbaum bildirib ki, ABŞ sürətlə “son dərəcə mənfi maliyyə vəziyyətinə” yaxınlaşır və bu proses, onun fikrincə, Amerika iqtisadiyyatının çöküşü ilə nəticələnə bilər.
Jewish Insider nəşrinə verdiyi müsahibələrdə Coş dəfələrlə vurğulayıb ki, yəhudi ənənələri və dini onun böyüdüyü mühitdə mərkəzi rol oynayıb. Onun sözlərinə görə, Qəzza zolağında 2023-cü ilin oktyabrında başlayan münaqişədən sonra dünyada yəhudi icması ilə bağlı məsələlər daha da kəskinləşib. Qruenbaum antisemitizmə qarşı açıq şəkildə çıxış edir.
“Mən yəhudi dəyərlərinin və dininin çox vacib olduğu bir icmada böyümüşəm”, – deyə o bildirib. “Bu, mənim tərbiyəmin, dünyagörüşümün və əxlaqi prinsiplərimin ayrılmaz bir hissəsidir. Düşünürəm ki, 7 oktyabrdan sonra yəhudi icmasının üzləşdiyi bir çox məsələ daha da aktuallaşıb”.
O, ilk dəfə ötən ilin dekabrında Mayami şəhərində Rusiya və ABŞ nümayəndə heyətləri arasında Ukrayna münaqişəsinin həlli məqsədi daşıyan danışıqlarda görünüb. Qruenbaum RİA Novosti-yə Uitkoffun rəhbərlik etdiyi ABŞ danışıqlar qrupunun üzvü olduğunu təsdiqləyib.
Coş Qruenbaum 2017–2021-ci illərdə ABŞ-ın İsraildəki səfiri Devid Fridmanın baş məsləhətçisi vəzifəsində çalışmış Arye Laytstounla birlikdə Şuranın baş məsləhətçisi təyin edilib.
Musavat.com
