Livan Ordusu komandanı General Rudolf Heykalın ABŞ-a səfəri şiə Hizbullah hərəkatının tərksilah edilməsi ilə bağlı vəziyyət aydınlaşana qədər təxirə salınıb.
Musavat.com xəbər verir ki, məlumatı ümumərəb qəzeti olan "Əşarq əl-Əvsət" Beyrutdakı hərbi mənbələrə istinadən yayıb.
Qəzetin məlumatına görə, general Heykal İsrailin təzyiqi səbəbindən bu həftə başlaması planlaşdırılan Vaşinqtona səfərini təxirə salmaq qərarına gəlib.
Bundan əlavə, israilpərəst ABŞ senatorları Lindsi Qrem və Coni Ernst Livan ordusunu tənqid edib və ona hərbi yardım göstərməyin məqsədəuyğunluğuna şübhə ilə yanaşıblar.
Qəzet qeyd edir ki, daha əvvəl ordu komandanlığı İsrailin Livanın cənubundakı sakinlərin evlərində silah və sursat anbarlarının axtarışı ilə bağlı tələbini rədd edib. General Heykal bildirib ki, "hərbi qüvvələr məhkəmə qərarı olmadan bu cür hərəkətlər edə bilməz". Avqust ayında Livan Silahlı Qüvvələri hərbiləşdirilmiş qrupları tərksilah etmək planını həyata keçirməyə başlayanda komandir xəbərdarlıq edib ki, proses "dialoq tələb edir və güc yolu ilə həyata keçirilə bilməz".
Parlament sədrinin müavini İlyas Bu Saab nəşrə verdiyi müsahibədə İsrailin son zamanlar Livan Ordusunu öz nəzarəti altında olan hərbi polis qüvvələrinə çevirməyə çalışdığını bildirib: "Livan Ordusunun İsrail Baş naziri Binyamin Netanyahunun və ya başqasının şıltaqlığına tabe olması qəbuledilməzdir".
Hazırda Litani çayının cənubunda 9000 əsgər yerləşdirilib və hökumət tərəfindən təsdiq edilmiş cədvələ uyğun olaraq Hizbullah hərbi qurğularını sökmək üzərində işləyir. Prezident Cozef Aunun 13 noyabrda bildirdiyi kimi, davam edən İsrail hücumları silahlı qüvvələrin 27 noyabr 2024-cü il tarixli atəşkəs müqaviləsinə uyğun olaraq bütün cənub sərhədi boyunca yerləşdirilməsini başa çatdırmasına mane olur.
Musavat.com
