Milli Məclisin bu plenar iclasında Əmək Məcəlləsinə dəyişikliklər müzakirəyə çıxarılıb.
Musavat.com-un məlumatına görə, layihəyə əsasən, məzuniyyət hüququ 46 təqvim günü olan xüsusi xidmətləri olan işçilərin siyahısında dəyişiklik ediləcək.
Beləliklə, aşağıdakı işçilərə 46 təqvim günündən az olmayaraq məzuniyyət veriləcək:
Azərbaycan Respublikasının ərazi bütövlüyünün, müstəqilliyinin və konstitusiya quruluşunun müdafiəsi ilə, 1990-cı ilin 20 Yanvar hadisələri ilə, hərbi xidmət vəzifələrini (xidməti vəzifələri) yerinə yetirməklə və ya Çernobıl AES-də hərbi xidmət vəzifələrini (xidməti vəzifələri) yerinə yetirməklə əlaqədar səbəblərdən əlilliyi olan işçilərə;
Azərbaycan Respublikasının ərazi bütövlüyü uğrunda aparılan döyüş əməliyyatlarında iştirak etdiyinə görə müharibə veteranı adı almış işçilərə;
Döyüş əməliyyatı aparılan ölkədə hərbi xidmət borcunu yerinə yetirmiş hərbi qulluqçu olmuş işçilərə;
Azərbaycan Respublikasının ən yüksək təltifi ilə təltif olunmuş işçilərə.
Müzakirələrdən sonra dəyişiklik səsverməyə qoyularaq sonuncu oxunuşda qəbul edilib.
E.Paşasoy,
Musavat.com
