Belarus Prezidenti Aleksandr Lukaşenko Ukrayna dövlət başçısı Volodimir Zelenskinin xüsusi nümayəndələri ilə Minskdə keçirdiyi gizli görüşün detallarını açıqlayaraq Kiyev rəhbərliyini Belarusun hərbi proseslərə cəlb edilməsi cəhdlərindən çəkinməyə çağırıb.
Musavat.com xəbər verir ki, Belarus lideri Ukrayna rəsmiləri ilə apardığı danışıqlara toxunaraq onlara birbaşa və kəskin xəbərdarlıq etdiyini bildirib. Lukaşenko Ukrayna tərəfinə ünvanladığı ultimatumun məzmununu bu sözlərlə ifadə edib: "Bax, elə bu məkanda bu yaxınlarda Zelenskinin nümayəndələri qonaq idi. Mən onlara açıq şəkildə dedim: "Uşaqlar, siz öz prezidentinizə çatdırın – əgər o, bizimlə bu tonda danışa biləcəyini və üstəlik bizi müharibəyə cəlb edəcəyini düşünürsə, yaxşıca dərk etməlidir ki, müharibənin keyfiyyəti bir anın içində kökündən dəyişəcək. Bu, tamamilə fərqli bir müharibə olacaq".
Belarus dövlət başçısı çıxışının davamında qeyd edib ki, onun bu kəskin bəyanatından sonra Ukrayna Prezidenti Volodimir Zelenski irəli sürülən şərtlərə rəsmi şəkildə cavab verib. Lukaşenkonun sözlərinə görə, rəsmi Kiyev daxil olan bu ciddi mesajdan sonra Minskin münaqişəyə sürüklənməsinin Ukrayna üçün yaradacağı təhlükəli nəticələri tam olaraq dərk edir və Belarus xəttini keçməməyə çalışır.
Musavat.com
