Rusiya Prezidentinin mətbuat katibi Dmitri Peskov gündəmin ən qaynar mövzuları — dolların taleyi, Amerika şirkətlərinin geri dönüşü və Ukrayna üzrə gözlənilən yeni danışıqlar raundu ilə bağlı mühüm bəyanatlar verib.
Musavat.com xəbər verir ki, Peskov Kremlin iqtisadi müstəvidə Vaşinqtonla əməkdaşlığa açıq olduğunu bildirib.
Peskovun brifinqindən ən diqqətçəkən məqamlar:
"Dolların sahibi biz deyilik, amma ondan imtina da etməmişik"
Peskov Rusiyanın dollardan imtina etməsi barədə iddialara nöqtə qoyub. O bildirib ki, Rusiya deyil, məhz ABŞ öz valyutasından siyasi təzyiq vasitəsi kimi istifadə edərək məhdudiyyətlər tətbiq edib:
"Rusiya dollardan istifadəni dayandırmayıb. ABŞ özü digər ölkələrin dollarla əməliyyat aparmaq hüququnu məhdudlaşdırıb. Bu, dolların dünyadakı etibarına zərbə vurur, lakin biz iqtisadi əməkdaşlıq təklifimizi qüvvədə saxlayırıq".
Amerika şirkətləri Rusiyaya qayıtmaq üçün növbəyə durub?
Kremlin sözçüsü iddia edib ki, bir çox ABŞ şirkəti Rusiya bazarını tərk etdikləri üçün peşmandırlar və geri qayıtmaq yollarını axtarırlar:
Şirkətlərin marağı: "Biz bilirik ki, ABŞ-ın bir çox nəhəng şirkəti Rusiyaya qayıtmaqda maraqlıdır".
Birgə müəssisələr: Rusiya Vaşinqtona yeni iqtisadi tərəfdaşlıq modelləri və birgə müəssisələr qurmağı təklif edir.
Fələstinə 1 milyard dollar: "Biz sözümüzü tuturuq"
Donald Trampın təşəbbüsü olan "Sülh Şurası" ilə bağlı mövqeyini hələ tam formalaşdırmayan Moskva, praktiki addımlarda hamıdan öndə olduğunu xatırladıb:
"Rusiya yeganə ölkədir ki, Fələstin xalqına və Qəzzanın bərpasına kömək üçün artıq 1 milyard dollar vəsait ayırmaq barədə qəti qərar verib".
Ən mühüm anons isə Ukrayna münaqişəsinin həlli ilə bağlı növbəti raundun keçiriləcəyi tarixdir. Peskov təsdiqləyib ki, gələn həftə Rusiya, ABŞ və Ukrayna nümayəndələrinin yeni görüşü baş tutacaq.
Məlumata görə, danışıqlar masasında əsas mövzular ərazilərin statusu və təhlükəsizlik zəmanətləri olacaq. Görüşün Mayami və ya yenidən Abu-Dabidə keçirilməsi ehtimal edilir. Politoloqlar hesab edir ki, bu raundda atəşkəs istiqamətində ciddi irəliləyiş əldə oluna bilər.
Musaat.com
