Rusiya hakimiyyəti ABŞ Dövlət Departamentini ikitərəfli münasibətlərdə yaranan “qıcıqlandırıcı məsələlər” üzrə dialoqu dar çərçivəyə salmamağa çağırıb.
Musavat.com xarici agentliklərə istinadən xəbər verir ki, bunu Rusiyanın ABŞ-dakı səfiri Aleksandr Darçiyev “Kommersant” qəzetinə müsahibəsində deyib.
Rusiyanın fikrincə, problemlərin həlli üçün ölkələr “başlanğıc nöqtəyə qayıtmalı” və 2016-cı ildə başlayan “Rusiya–ABŞ diplomatik müharibəsi”nin nəticələrini araşdırmağa başlamalıdırlar.
“Biz əlimizi yanımıza salmırıq və Dövlət Departamentinin danışıqlar aparan komandasını prezidentlərin tapşırığının əksinə olaraq dialoqu daraltmamağa çağırırıq”, — deyə Darçiyev bildirib və vurğulayıb ki, “mövzunu yalnız viza məsələləri və diplomatik missiyaların gündəlik işinin təmin olunması ilə məhdudlaşdırmaq olmaz, dialoq daha geniş mənada normallığın bərpasına yönəlməlidir”.
“İlk addım kimi 2016-cı ilin dekabrına — o vaxtkı Ağ Ev sahibi Barak Obamanın Hillari Klintonun prezident seçkilərində məğlubiyyətindən məyus olaraq Rusiya–ABŞ diplomatik müharibəsi mexanizmini işə saldığı dövrə qayıtmaq lazımdır”,-deyə səfir bildirib.
Aleksandr Darçiyev bildirib ki, Rusiya bu istiqamətdə “israrlı şəkildə işləməyə” hazırdır.
İkitərəfli münasibətlərdə “qıcıqlandırıcı məsələlər” üzrə Rusiya–ABŞ məsləhətləşmələri əvvəlki administrasiya dövründə başlamışdı. Donald Trampın yenidən Ağ Evə qayıdışından sonra tərəflər diplomatik missiyaların fəaliyyətini normallaşdırmaq və münasibətləri bərpa etmək məqsədilə iki dəfə — 27 fevral və 10 aprel tarixlərində İstanbulda görüşüblər. Üçüncü raundun iyunda keçirilməsi gözlənilsə də, görüş ABŞ-ın təşəbbüsü ilə ləğv olunub.
Musavat.com
