Dekabr ayında Ukrayna Rusiyanın enerji infrastrukturuna hücumlarını əhəmiyyətli dərəcədə artıraraq, tammiqyaslı müharibənin başlanğıcından bəri rekorda nail olub.
Musavat.com "Bloomberg"ə istinadən xəbər verir ki, Ukraynanın dekabr ayında Rusiyanın enerji obyektlərinə endirdiyi zərbələr aylıq rekord həddə çatıb.
Bu dövrdə ən çox sayda obyekt hücuma məruz qalıb və hədəflərin diapazonu genişlənib.
"Bloomberg"in hesablamalarına görə, ay ərzində Rusiyanın neft emalı zavodlarına, neft tankerlərinə və digər dəniz obyektlərinə, eləcə də boru kəməri sisteminin əsas elementlərinə ən azı 24 zərbə qeydə alınıb.
Ukrayna silahlı qüvvələri ilk dəfə dəniz hasilat infrastrukturuna diqqət yetirib. Xüsusilə, Xəzər dənizindəki Lukoyl neft və qaz yataqlarına dəfələrlə hücum edilib.
Həmçinin dekabr ayında Qara dənizdəki Taman və Rostov limanlarına hücum edilib və bir neçə tanker sıradan çıxarılıb.
Ay ərzində Rusiyanın "kölgə donanması"na qarşı əməliyyatlar davam edib. Məqalədə qeyd olunur ki, bu hadisələr fonunda Rusiya hakimiyyəti gələn il neft və qaz gəlirlərinin büdcənin 23 faizinə qədər azalacağını proqnozlaşdırır - bu, indiyə qədər qeydə alınan ən aşağı səviyyədir.
Musavat.com
