Məşhur müğənni İbrahim Tatlısəsin keçmiş həyat yoldaşı Ayşegül Yıldız siyasətə qoşulub.
Musavat.com xəbər verir ki, o, Milliyyətçi Hərəkat Partiyasına (MHP) üzv olaraq Türkiyə Böyük Millət Məclisində keçirilən partiya toplantısında iştirak edib və partiya lideri Dövlət Baxçalı ilə görüşüb.
Məlumata görə, Yıldız MHP-nin Eyüpsultan rayon təşkilatının idarə heyətində təmsil olunur. Ayşegül Yıldız sosial media hesabında paylaşdığı videoda MHP rəhbərliyi ilə birlikdə Ankarada keçirilən tədbirlərdə iştirak etdiyini bildirib və partiya rəhbərliyinə dəstəyini ifadə edib.
Ayşegül Yıldız kimdir?
Ayşegül Yıldız Türkiyə ictimaiyyətinə daha çox İbrahim Tatlısəslə evliliyi ilə tanınıb. Cütlük 2011-ci ildə ailə qurub. Onların bu nikahdan Elif Ada adlı qız övladı dünyaya gəlib. Lakin evlilik uzun sürməyib və onlar 2013-cü ildə boşanıblar.
Boşandıqdan sonra mediadan uzaq həyat sürən Yıldız son illərdə əsasən qızı ilə bağlı paylaşımları və televiziya proqramlarındakı çıxışlarıyla gündəmə gəlib.
Boşanmadan sonra mətbuatda ayrılığın səbəbləri ilə bağlı müxtəlif iddialar yayılıb. Həmin dövrdə yazılan xəbərlərdə Tatlısəsin keçmiş həyat yoldaşı Derya Tuna və oğlu ilə bağlı biznes qərarlarının ailədaxili gərginlik yaratdığı, Ayşegül Yıldızın isə bundan narahat olduğu bildirilib. Mətbuat bu məsələnin tərəflər arasında tez-tez mübahisələrə səbəb olduğunu yazıb.
İllər sonra Ayşegül Yıldız münasibətləri barədə açıqlamalar verib. O bildirib ki, atasını çox kiçik yaşda itirib və bəlkə də həyatındakı həmin boşluğu İbrahim Tatlısəslə doldurmağa çalışıb. Yıldız hətta "Atam sağ olsaydı, yəqin ki, belə bir münasibət yaşamazdım" sözləri ilə diqqət çəkib. Onun sözlərinə görə, Tatlısəslə 16 yaşında tanış olub, münasibətləri isə 19 yaşında başlayıb.
Maraqlıdır ki, ayrılıqlarına baxmayaraq, Ayşegül Yıldız sonrakı illərdə keçmiş həyat yoldaşı haqqında əsasən müsbət fikirlər səsləndirib. O, Tatlısəsin mediada göründüyündən daha nəzakətli biri olduğunu deyib və qızları Elif Ada səbəbindən əlaqələrinin davam etdiyini vurğulayıb.
İbrahim Tatlısəsin siyasi görüşü
İbrahim Tatlısəs uzun illərdir Türkiyədə mərkəz-sağ və mühafizəkar siyasi xəttə yaxın mövqeyi ilə tanınır. O, müxtəlif dövrlərdə siyasətlə aktiv maraqlanıb və bir neçə dəfə deputatlığa namizəd olmaq istəyib.
Tatlısəs 2007-ci ildə Cem Uzanın rəhbərlik etdiyi Genç Parti sıralarında siyasətə qatılıb və seçkilərdə namizəd olub.
Sonrakı illərdə isə o, açıq şəkildə Rəcəb Tayyib Ərdoğan və AK Partiyaya dəstək verib. İbrahim Tatlısəs rəsmi olaraq AK Partiyaya üzv olub və dəfələrlə Şanlıurfadan deputatlığa namizədliyini irəli sürüb. 2023-cü ildə o, beşinci dəfə AK Partidən millət vəkilliyinə namizəd olmaq üçün müraciət etmişdi.
Mediada və ictimai çıxışlarında Tatlısəs tez-tez Ərdoğanı dəstəkləyən fikirlər səsləndirib. Hətta seçki mitinqlərində Ərdoğanla eyni səhnəni bölüşərək ona dəstəyini nümayiş etdirib.
İbrahim Tatlısəsin siyasi baxışları əsasən AK Partiya və Ərdoğana yaxın, milliyyətçi-mühafizəkar xəttə uyğun hesab olunur. Bununla belə, o, özünü peşəkar siyasətçidən çox ictimai fiqur kimi təqdim edib və siyasi fəaliyyətini daha çox Şanlıurfaya xidmət etmək istəyi ilə izah edib.
Könül
Musavat.com 
