İnsanabənzər robotların istehsalı üzrə aparıcı şirkətlərdən biri olan UBTech etiraf edib ki, hətta ən inkişaf etmiş humanoid robotlar belə hazırda insan əməyindən 2–3 dəfə zəif işləyir.
Musavat.com xəbər verir ki, şirkətin açıqlamasına əsasən, bu robotların effektivliyi cəmi 50–70 faiz təşkil edir.
Bildirilib ki, hazırda humanoid robotlardan yalnız sadə və təkrarlanan əməliyyatlarda istifadə olunur. Onlar əsasən əşyaların bir yerdən başqa yerə daşınması, elementar montaj işləri və ilkin keyfiyyətə nəzarət funksiyalarını yerinə yetirə bilir. Daha mürəkkəb istehsal proseslərində isə robotlar hələlik insanı əvəz edə bilmir.
Buna baxmayaraq, texnologiyaya maraq azalmaq əvəzinə artır. Bir sıra avtomobil nəhəngləri artıq UBTech-in robotlarını zavod şəraitində sınaqdan keçirir. Şirkət son olaraq Airbus ilə əməkdaşlıq sazişi imzalayıb.
UBTech 2026-cı ildə 10 min humanoid robotun istehsalını planlaşdırır. Şirkətin proqnozlarına görə, robotların insan səviyyəsinə yaxın — təxminən 80 faizlik effektivliyə çatması yalnız 2027-ci ildən sonra mümkün olacaq.
Beləliklə, humanoid robotlar hələlik zavodlarda insan əməyinə alternativ ola bilmir, lakin iri sərmayələr artıq gələcəyin robotlaşdırılmış istehsalına yönəlib.
Musavat.com
