Dünya Çempionatı-2026 çərçivəsində bu gün axşam və səhər saatlarına doğru baş tutacaq oyunlar pley-off mərhələsinə vəsiqə uğrunda həlledici xarakter daşıyır. Bir çox komandanın taleyi məhz bu qarşılaşmalardan asılı olacaq.
Norveç-Fransa görüşü 23:00-da başlayır.
İkincilər dünya futbolunun ən titullu komandalarından biridir. "Xoruzlar" 1998 və 2018-ci illərdə dünya çempionu olub, 2006 və 2022-ci illərdə final oynayıb. Bundan başqa, Avropa çempionu (1984, 2000), UEFA Millətlər Liqasının qalibi (2021) kimi böyük uğurlara malikdir.
Dünya futboluna Zinəddin Zidan, Tyerri Anri, Mişel Platini, Kilian Mbappe, Antuan Qrizmann kimi əfsanələri bəxş edib.
Hazırda Fransa heyətində Kilian Mbappe, Usman Dembele, Eduardo Kamavinqa, Orelyen Çuameni və Vilyam Saliba kimi dünya səviyyəli ulduzlar çıxış edir.
Norveç isə tarixində cəmi 4 dəfə (1938, 1994, 1998 və 2026) dünya çempionatına vəsiqə qazanıb. Ən böyük uğuru 1998-ci ildə 1/8 finala yüksəlməsi olub.
Hazırkı heyətin əsas simaları Erlinq Haaland və Martin Edeqor hesab olunur. Son illərdə Norveç uzun fasilədən sonra yenidən dünya futbolunun diqqət mərkəzinə qayıdıb.
23:00-da start götürəcək ikinci görüş Seneqal-İraqdır.
Seneqal Afrika futbolunun son illərin ən güclü komandalarındandır. 2002-ci ildə debütündə sensasiya yaradaraq dünya çempionatının 1/4 finalına qədər irəliləmişdi. 2022-ci ildə də 1/8 final oynayıb. 2021-ci ildə Afrika Millətlər Kubokunun qalibi olub.
Komandanın əsas ulduzları Sadio Mane, Kalidu Kulibali, İsmaila Sarr və Eduar Mendi kimi futbolçulardır.
İraq isə dünya çempionatında yalnız bir dəfə - 1986-cı ildə iştirak edib. 2007-ci ildə Asiya Kubokunu qazanması ölkə futbolunun ən böyük uğuru sayılır. Dünya çempionatına qayıtması İraq futbolu üçün tarixi nailiyyət hesab edilir.
Uruqvay-İspaniya (27 iyun, 04:00) qarşılaşması bu turun ən maraqlı duelidir.
Uruqvay dünya çempionatının ilk iki qalibindən biridir. Komanda 1930 və 1950-ci illərdə dünya çempionu olub. Bundan başqa, 15 dəfə Amerika Kubokunu qazanaraq qitənin ən titullu yığmalarından sayılır.
Tarixinin ən məşhur futbolçuları Luis Suares, Edinson Kavani, Dieqo Forlan, Enzo Françeskoli və hazırda Federiko Valverde, Ronald Arauxodur.
İspaniya isə 2010-cu ildə dünya çempionu olub, 1964, 2008, 2012 və 2024-cü illərdə Avropa çempionu adını qazanıb. Son illərdə Lamin Yamal, Pedri, Rodri, Niko Uilyams və Qavi komandanın əsas simalarıdır.
Kabo Verde-Səudiyyə Ərəbistanı (27 iyun, 04:00) oyunu da dördgözlə gözlənilən görüşlər sırasındadır.
Kabo Verde tarixində ilk dəfə dünya çempionatının final mərhələsində iştirak edir. Bu ada dövləti son illərdə Afrika futbolunda sürətli inkişaf göstərərək diqqət çəkib. Komandanın əsas futbolçuları Rayan Mendes, Bebe və Jamiru Monteyrudur.
Səudiyyə Ərəbistanı isə dünya çempionatlarında daha təcrübəlidir. İlk dəfə 1994-cü ildə iştirak edib və elə həmin il 1/8 finala yüksəlib. 2022-ci ildə Lionel Messili Argentinanı məğlub etməsi turnirin ən böyük sensasiyalarından biri olmuşdu. Hazırkı heyətdə Salem Əl-Davsari komandanın əsas lideridir.
Misir-İran (27 iyun, 07:00) oyunu da çox maraqla gözlənilir.
Misir Afrika futbolunun ən titullu millilərindən biridir. 7 dəfə Afrika Millətlər Kubokunun qalibi olub. Dünya çempionatlarında isə 1934, 1990, 2018 və 2026-cı illərdə iştirak edib. Ən böyük ulduzu "Liverpul"un hücumçusu Məhəmməd Salahdır. Bundan başqa, Mahmud Həsən "Trezege", Mustafa Məhəmməd kimi futbolçular da heyətdə önə çıxır.
İran isə Asiyanın ən güclü komandalarından hesab olunur. Dünya çempionatlarında ardıcıl iştirak etməsi ilə seçilir. Tarixində hələ pley-off mərhələsinə yüksəlməsə də, daim güclü rəqiblərə ciddi müqavimət göstərib. Əli Daei, Mehdi Mahdavikia, Əli Kərimi İran futbolunun əfsanələridir. Hazırda Mehdi Taremi və Sərdar Azmun komandanın əsas hücum gücüdür.
Bu turun son oyunu Yeni Zelandiya-Belçikadır (27 iyun, 07:00)
Belçika son onilliyin ən güclü Avropa komandalarından biridir. 2018-ci ildə dünya çempionatının bürünc medalını qazanıb. Dünya futboluna Kevin De Bruyne, Eden Hazard, Romelu Lukaku, Tibo Kurtua və Vensan Kompani kimi böyük ulduzlar bəxş edib. Hazırda da komanda Avropanın favoritlərindən sayılır.
Yeni Zelandiya isə 1982, 2010 və 2026-cı illərdə dünya çempionatına qatılıb. 2010-cu ildə qrup mərhələsini məğlubiyyətsiz başa vurması (üç heç-heçə) diqqətçəkən nəticə idi.
Komandanın əsas ulduzu İngiltərə Premyer Liqasında çıxış edən Kris Vuddur. Bu qarşılaşmada Yeni Zelandiya tarixinin ən böyük sensasiyalarından birini etməyə çalışacaq.
Yekun olaraq bildiririk ki, bu altı qarşılaşma qrup mərhələsinin son turunun ən həlledici oyunlarıdır. Xüsusilə Norveç – Fransa, Uruqvay – İspaniya və Misir – İran matçları qrupdakı yekun sıralamaya birbaşa təsir göstərəcək və 1/16 final mərhələsinə yüksələcək komandaların müəyyənləşməsində əsas rol oynayacaq.
Cavanşir Abbaslı
Musavat.com
