Böyük Britaniya hökuməti uşaqların sağlamlığını qorumaq üçün sərt addım atıb. Yeni qərara əsasən, zərərli qida məhsullarının reklamı ciddi şəkildə məhdudlaşdırılıb.
Musavat.com xəbər verir ki, fastfud, şirniyyat və şirin içkilərin televiziya reklamına yalnız saat 21:00-dan sonra icazə veriləcək. Bu kateqoriyaya aid məhsulların onlayn reklamı isə günün istənilən vaxtında tam qadağan olunur.
Gözlənilən nəticələr
Uşaqların illik qida rasionundan 7,2 milyard kalori çıxarılacaq
20 minə yaxın uşaqda piylənmənin qarşısı alınacaq
Səhiyyə sistemində diabet, xərçəng və ürək-damar xəstəliklərinin azalması hesabına təxminən 2 milyard funt sterlinq qənaət ediləcək
Rəsmi statistika nə deyir?
İbtidai məktəblərdə uşaqların 22,1%-i artıq çəki və ya piylənmədən əziyyət çəkir
Yuxarı siniflərdə bu göstərici 35,8%-ə yüksəlir
Diş çürüməsi 5–9 yaşlı uşaqlar arasında xəstəxanaya yerləşdirilmənin əsas səbəbidir
Qadağalar bununla bitmir
Reklam məhdudiyyəti genişmiqyaslı dövlət proqramının yalnız bir hissəsidir. Plan çərçivəsində:
Şirin içkilərə tətbiq edilən vergi genişləndirilir (südlü kokteyllər də daxil edilir)
16 yaşdan aşağı uşaqlara energetik içkilərin satışı qadağan olunur
Yerli hakimiyyətlərə məktəblərin ətrafında fastfud obyektlərini yasaqlamaq səlahiyyəti verilir
Uşaq bağçalarında dişlərin təmizlənməsi üzrə dövlət proqramı tətbiq edilir
Rəsmi London bildirir ki, məqsəd biznesə zərbə vurmaq yox, uşaqların sağlam gələcəyini qorumaqdır və bu siyasət gələcəkdə daha da sərtləşdiriləcək.
Musavat.com
