Belarus prezidenti Aleksandr Lukaşenko Ukrayna lideri Volodimir Zelenskiyə müraciət edərək onu danışıqları pozmamağa çağırıb.
Musavat.com xəbər verir ki, Lukaşenko çıxışında belə deyib:
“Əgər Ukraynanın mövcud sərhədlərini qorumaq istəyirsinizsə, danışıqlara razılaşmaq lazımdır. Prosesi pozmayın”.
O əlavə edib ki, Ukraynanın hələ də dənizə çıxışı olduğu müddətdə, Odessa və Nikolayev nəzarətdə qaldığı halda vəziyyətin bir anda dəyişə biləcəyini Zelenski anlamalıdır:
“Bu şəhərlər bir anın içində itirilə bilər”.
Belarus lideri həmçinin müharibənin əvvəlkindən daha çox sonlanmağa yaxın olduğunu düşündüyünü bildirib. Lukaşenko ABŞ-ın təklif etdiyi sülh sazişinin Ukrayna tərəfindən qəbul ediləcəyinə inandığını vurğulayıb:
“Top hazırda Ukraynanın tərəfindədir. Cəbhədəki mövcud vəziyyəti nəzərə alsaq, sazişdən imtina ölkənin tam itirilməsi ilə nəticələnə bilər”, – deyə o qeyd edib.
Musavat.com
