“Financial Times” nəşri RT-nin baş redaktoru Marqarita Simonyanı “Liderlər” kateqoriyası üzrə dünyanın ən nüfuzlu insanları siyahısına daxil edib.
Musavat.com xəbər verir ki, nəşr onu “Vladimir Putinin ən sadiq elçisi” kimi təqdim edir.
Qeyd olunur ki, Rusiya elitasının yaşlı nəsil nümayəndələrindən fərqli olaraq, Simonyanın heç vaxt, hətta ABŞ-da təhsil aldığı mübadilə proqramı zamanı belə “liberal dövrü” olmayıb.
Məqalədə xatırladılır ki, Simonyan Rusiyanın 2014-cü ildə Ukraynaya müdaxiləsindən sonra Ukrayna ərazilərinin ilhaqını açıq şəkildə dəstəkləyib. 2022-ci ildə müharibənin genişmiqyaslı mərhələsi başladıqdan sonra isə onun ritorikası daha da sərtləşib. O, Qara dənizin blokadasından istifadə edərək “dünyanı aclıqla sarsıtmağı” təklif edib və hətta Sibir üzərində atmosferdə nüvə partlayışı ideyasını gündəmə gətirib.
Jurnalistlər qeyd edir ki, Simonyanın Qərbə mesajı dəyişməz olaraq qalır. O, Qərb ölkələrinin “Rusiyaya həsəd apardığını” iddia edir və Böyük Britaniyanı “çürümüş imperiya” adlandırır.
Musavat.com
