ABŞ prezidenti Donald Trumpın Florida ştatındakı Mar-a-Laqo iqamətgahında İsrailin baş naziri Benyamin Netanyahu ilə keçirdiyi görüşdə İranın ballistik raket proqramı əsas müzakirə mövzularından biri olub.
Musavat.com xəbər verir ki, CBS News-un iki amerikalı rəsmi mənbəyə istinadən yaydığı məlumata görə, Vaşinqtonda aparılan müzakirələr “zərbə olub-olmayacağı”ndan daha çox, ABŞ-ın İsrailə hansı formada yardım göstərə biləcəyi üzərində cəmləşib.
Məlumata əsasən, xüsusilə İsrail hərbi təyyarələrinin havada yanacaqla təmin edilməsi — yəni hava-hava yanacaq doldurma dəstəyi variantı nəzərdən keçirilir. Bu model ABŞ-ın birbaşa müharibəyə qoşulmadan, lakin əməliyyatın logistikasını təmin etməklə İsrailin mümkün hərbi addımlarına dəstək verməsi ehtimalını gündəmə gətirir.
Belə yanaşma Vaşinqtona eskalasiyaya tam daxil olmadan İrana qarşı təzyiq rıçaqlarını artırmaq imkanı yarada bilər.
Hazırda nə Ağ Ev, nə də İsrail hökuməti rəsmi hərbi əməliyyat planını təsdiqləyib.
Musavat.com
