ABŞ prezidenti Donald Tramp Tayland və Kamboca hökumət başçıları Anuthin Chanvyrakun və Khun Manet ilə danışıb.
Musavat.com xəbər verir ki, o, bu barədə Truth Social hesabında paylaşım edib: “Tayland və Kambocanın baş nazirləri ilə onlar arasında uzun müddətdir ki, davam edən və yenidən baş verən uğursuz qarşıdurma məsələsi ilə bağlı çox yaxşı söhbət etdim. Onlar tam atəşkəsə və Malayziyanın baş naziri Ənvər İbrahimin dəstəyi ilə mənimlə razılaşdırılmış sülh müqavilələrinin orijinal versiyasında nəzərdə tutulan mövqelərə qayıtmağa razı oldular".
Bloomberg-in məlumatına görə, Taylandın baş naziri Anuthin Chanvyrakun ABŞ prezidenti Donald Trampla iki ölkənin sərhədində Tayland və Kamboca hərbçiləri arasında baş verən toqquşmalarla bağlı telefon danışığı barədə məlumat verib: "Trampa izah etməli oldum ki, biz təcavüzkar deyilik, biz yalnız cavab veririk və Kambocaya bizimlə əlaqə saxlamamağın daha yaxşı olduğunu başa salırıq. Tramp hər şeyi başa düşdüyünü və xarici işlər nazirimizin istənilən vaxt dövlət katibi Marko Rubioya zəng edə biləcəyini, mənə isə istənilən vaxt Trampa zəng edə biləcəyimi bildirib".
Çanvyrakunun sözlərinə görə, o, Trampa deyib ki, Amerika prezidenti sülh müqavilələrini pozan Kamboca hakimiyyəti ilə danışmalıdır.
Qeyd edək ki, dekabrın 7-də Tayland və Kamboca sərhədində silahlı toqquşmalar baş verib, tərəflər bir-birini bu ilin əvvəlində ABŞ-ın vasitəçiliyi ilə əldə edilən atəşkəsi pozmaqda ittiham edirlər. İyul ayında baş verən toqquşmalar 48 nəfərin ölümünə səbəb olub.
Tramp əvvəllər Tayland və Kamboca arasında yeni silahlı münaqişənin qarşısını almaq üçün bütün səylərini əsirgəməyəcəyinə söz vermişdi.
Musavat.com
