Həbs cəzası çəkən daha bir məhbusun ölümü Rusiyada penitensiar sistemlə bağlı sualları yenidən gündəmə gətirib.
Musavat.com xarici agentliklərə istinadən xəbər verir ki, Sankt-Peterburqda mağazalarda müharibə əleyhinə vərəqələr yaydığına görə məhkum edilən zərgər Aleksandr Dotsenko koloniyada keçirdiyi infarktdan sonra vəfat edib. Bu barədə onun vəkili Sergey Podolski məlumat verib.
Müdafiəçinin sözlərinə görə, 65 yaşlı Dotsenko fevralın 12-də infarkt diaqnozu ilə Mariinsk xəstəxanasına yerləşdirilib. Lakin koloniya əməkdaşları nə vəkili, nə də ailə üzvlərini məlumatlandırıblar. Hadisə barədə onlar yalnız iki gün sonra anonim mənbədən xəbər tutublar. Daha sonra həkimlər Dotsenkonun ölümünü onun qızına bildiriblər.
Həbs olunmazdan əvvəl Dotsenko zərgər kimi çalışıb. 2024-cü ildə o və həyat yoldaşı, rəssam Anastasiya Dyudyaeva “terrorçuluğa çağırışlar” maddəsi (Rusiya Cinayət Məcəlləsinin 205.2-ci maddəsinin 1-ci hissəsi) üzrə təqsirli biliniblər.
Onların saxlanılmasına səbəb Sankt-Peterburqdakı “Lenta” supermarketində alıcılar tərəfindən tapılan, üzərində şeirlər yazılmış salfetlər olub. İstintaqın versiyasına görə, həmin mətnlər “Stepan Banderanı tərifləyir” və “Vladimir Putinə qarşı hərəkətlərə çağırışlar” ehtiva edirdi. Astra nəşrinin dəqiqləşdirməsinə görə, vərəqələrdə Putinə qarşı sərt ifadələr yer alıb.
Musavat.com
