Britaniya öz ərazisində dondurulmuş 8 milyard funt sterlin dəyərində Rusiya aktivlərini Ukrayna üçün istifadə etmək fikrindən daşınıb.
Musavat.com xəbər verir ki, məlumatı Financial Times yayıb. Nəşrin məlumatına görə, London bu addımı yalnız beynəlxalq tərəfdaşlarının dəstəyi ilə atmağı planlaşdırmışdı, lakin oxşar Aİ planı uğursuzluğa düçar olduqdan sonra Britaniya hakimiyyəti təkbaşına hərəkət etməmək qərarına gəlib. İmtina üçün əsas səbəb bankların hüquqi narahatlıqları idi - maliyyəçilər Moskvanın məhkəmə iddialarından və Rusiyanın qisas alması halında hökumət zəmanətlərinin olmamasından qorxurlar.
Bunun əvəzinə, Böyük Britaniya alternativ maliyyələşdirmə variantlarına və 2026-cı il üçün mövcud Dünya Bankının kredit zəmanətlərinin yenidən bölüşdürülməsinə diqqət yetirəcək. Bu qərardan sonra Avropa Birliyi də "B Planı"na keçərək Kiyevə Rusiya aktivləri əvəzinə öz ümumi büdcəsi ilə təmin edilmiş 90 milyard avroluq kredit verməyə razılaşıb.
Britaniyada yeganə istisna rusiyalı oliqarx Roman Abramoviçin işidir - hökumət hələ də onun "Çelsi" Futbol Klubunun satışından əldə etdiyi 2,5 milyard funt sterlinqi Ukraynaya köçürmək niyyətindədir.
Musavat.com
