Ermənistanın iqtisadiyyat naziri Gevorq Papoyan rəsmi İrəvanın Moskvadan iqtisadi asılılığı minimuma endirmək və Rusiyanın tətbiq etdiyi idxal qadağalarını sarsıtmaq məqsədilə atdığı strateji addımları elan edib.
Musavat.com xəbər verir ki, erməni nazir parlamentdəki çıxışı zamanı Rusiyanın qadağalarından sonra Ermənistanın istixana məhsullarının artıq Rusiya bazarını hansı alternativ dövlətlərlə əvəzlədiyini rəsmən açıqlayıb.
Papoyan Kremlin iqtisadi təzyiqlərinə rəğmən, yerli istehsalçıların dövlət dəstəyi ilə yeni və daha etibarlı bazarlara çıxış əldə etdiyini böyük uğur kimi diqqətə çatdırıb: "Rusiya Federasiyasına məhsul idxalına qoyulan rəsmi məhdudiyyətlər fonunda, Ermənistan hökuməti tərəfindən subsidiyalaşdırılan müasir istixana məhsullarımız artıq uğurla ixrac edilməyə başlanıb. Hazırda biz Rusiyadan asılı qalmayaraq öz kənd təsərrüfatı mallarımızı Gürcüstan, Yunanıstan, Ukrayna, Qazaxıstan və digər Avropa ilə Asiya ölkələrinə rəsmən ixrac edirik".
İqtisadi ekspertlər qeyd edirlər ki, Ermənistanın parlament seçkilərindən dərhal sonra xüsusilə Ukrayna və Avropa İttifaqı üzvü olan Yunanıstan bazarlarına sızması rəsmi İrəvanın ticarət xəritəsini fundamental şəkildə dəyişmək niyyətini göstərir. Kremlin "Rosselxoznadzor" xətti ilə erməni məhsullarına tətbiq etdiyi blokada siyasəti, İrəvanın Qərbə yaxınlaşma kursu fonunda gözlənilən effekti verməyib və Ermənistan iqtisadiyyatını Rusiyanın inhisarından xilas edərək qlobal bazarlara inteqrasiyasını daha da sürətləndirib.
Musavat.com
