İranın 2025-ci ildə İsrailin hava zərbələrinə məruz qalmış Talqan-2 obyektində genişmiqyaslı möhkəmləndirmə işləri aparılır.
Musavat.com xəbər verir ki, 22 yanvar 2026-cı ilə aid peyk görüntüləri Tehranın obyektin ətrafını və əsas hissələrini dəmir-beton konstruksiyalarla gücləndirdiyini ortaya qoyur.
Məlumata görə, Talqan-2 obyekti keçmişdə nüvə sınaqları üçün istifadə edilsə də, burada nüvə materialı saxlanılmayıb və hər hansı radiasiya riski mövcud olmayıb. Hazırda aparılan tikinti işləri obyektin bərpasına deyil, gələcək hava zərbələri və ya raket hücumlarına qarşı müdafiənin maksimum səviyyədə artırılmasına yönəlib.
Peyk materiallarının təhlili göstərir ki, İran bu infrastrukturu tərk etmək niyyətində deyil. Əksinə, Tehran əməliyyat baxımından kritik əhəmiyyət daşıyan obyektləri qorumağı prioritet hesab edir. Xüsusilə Talqan-2 ərazisində möhkəmləndirmə işlərinin demək olar ki, yekunlaşması, İranın əsas sınaq və strateji obyektlərini müdafiə etməkdə qətiyyətli olduğunu göstərir.
Musavat.com
