"Bizim mənzillərimizi versələr, əlbəttə ki, Ağdama köçəcəyəm. Ora ata-baba yurdumuzdur. Artıq köç prosesi mərhələli şəkildə davam edir. Qohumlarımızın, əmioğlanlarımın bir qisminə mənzillər verilib, onlar artıq köçüblər. İnşallah, növbə bizə də çatacaq".
Bunu Musavat.com-a açıqlamasında müğənni Tacir Şahmaloğlu doğma yurdu Ağdama qayıdacağı ilə bağlı danışarkən deyib.
Xanəndə bildirib ki, mənzili təhvil verilən kimi tərəddüd etmədən Ağdama köçəcək. Onun sözlərinə görə, Bakıdakı iş rejimi də bu qərarına mane olmayacaq.
Tacir Şahmaloğlu qeyd edib ki, sənət fəaliyyəti ilə əlaqədar onsuz da ölkənin müxtəlif bölgələrinə, ən ucqar kəndlərinə tez-tez səfərlər edir. Buna görə də Ağdamda yaşasa belə, işləri ilə bağlı Bakıya gəlib-getməsi problem yaratmayacaq:
"Mənim işim elədir ki, elə Bakıda yaşasam da, rayonlara, ən ucqar kəndlərə toya gedirik. Fərqi nədir ki, Ağdamda da olsam, yenə gəlib-gedəcəyəm Bakıya. İşimlə bağlı gediş-gəlişim davam edəcək".
20 yaşında doğma yurdundan didərgin düşdüyünü xatırladan sənətçi övladlarının və gənc nəslin qayıdışa münasibətinə də toxunub:
"Bilmək olmaz, uşaqlar bəlkə də işlərinə görə Bakıda qalacaqlar. Onlar Bakıda doğulub boya-başa çatıblar, Ağdamda mənim yaşadığım kimi yaşamayıblar. Ona görə də Ağdamın qədrini mənim qədər hiss etməyə bilərlər. Amma mən mütləq gedəcəyəm. Mən Ağdama qayıdacağam".
Şahanə Rəhimli,
Musavat.com
