Çində texnologiya nəhəngi Huawei əməkdaşları üçün adi ofis anlayışını kökündən dəyişən nəhəng kampus layihəsini reallaşdırıb. Bu kompleks sadəcə iş məkanı deyil, demək olar ki, ayrıca bir şəhər təsiri bağışlayır.
Musavat.com xəbər verir ki, “Ox Horn Campus” adlanan bu futuristik kampus 12 fərqli zonadan ibarətdir və hər zona Avropanın məşhur şəhərlərinin memarlıq üslubundan ilhamlanaraq inşa olunub. Kompleksdə Parisin romantik küçələri, Veronanın klassik ruhu, Budapeştin tarixi memarlıq ab-havası vizual olaraq canlandırılıb.
Şirkətin açıqlamasına görə, bu qeyri-adi yanaşmanın əsas məqsədi əməkdaşlar üçün rahat, ilhamverici və stresssiz iş mühiti formalaşdırmaqdır. Huawei hesab edir ki, Avropa üslublu memarlıq sakitlik, harmoniya və komfort hissi yaradır və bu da birbaşa olaraq işçilərin motivasiyasına və məhsuldarlığına müsbət təsir göstərir.
Qeyd edək ki, bu unikal kampus Dunquan şəhərində yerləşir və artıq qlobal miqyasda texnologiya şirkətlərinin iş mühitinə yanaşması baxımından ən çox müzakirə olunan nümunələrdən birinə çevrilib. Huawei faktiki olaraq nümayiş etdirir ki, innovasiya təkcə texnologiyada deyil, həm də düşüncə tərzində və məkan quruculuğunda başlayır.
Musavat.com
