Səudiyyə Ərəbistanı ABŞ-yə İrana qarşı hərbi əməliyyatlarda istifadə olunması üçün Məkkədən təxminən 70 kilometr məsafədə yerləşən hərbi hava bazasından istifadəyə icazə verib.
Musavat.com xəbər verir ki, bu barədə "Reuters" agentliyi məlumat yayıb.
Məlumatda bildirilir ki, İslam dünyasının ən müqəddəs şəhərlərindən birinin yaxınlığında yerləşən bu hərbi obyekt ABŞ-nin İrana qarşı son əməliyyatları zamanı istifadə olunub.
İran mediası isə bununla bağlı yayımladığı xəbərlərdə "müqəddəs şəhər olan Məkkə Amerika qüvvələri üçün qoruyucu qalxana çevrilib" iddiasını irəli sürüb.
Qeyd edək ki, xəbərdə bəhs edilən hərbi obyekt Səudiyyə Ərəbistanının Məkkə inzibati bölgəsinə daxil olan Taif şəhəri yaxınlığındakı "Kral Fəhd" (King Fahd Air Base) hərbi hava bazasıdır. Bu baza coğrafi olaraq həqiqətən də müqəddəs Məkkə şəhərindən təxminən 70-80 km məsafədə yerləşir.
Riyadın bu bazanı ABŞ-nin istifadəsinə verməsinin (və ABŞ-nin buranı seçməsinin) əsas səbəbi coğrafi mövqeyidir. Baza ölkənin qərbində, Hicaz dağlarında yerləşir və İranın birbaşa idarə etdiyi "Şahid" tipli kamikadze dronlarının zərbə radiusundan kənardadır. Bu isə ABŞ hərbi təyyarələri, yanacaqdoldurma və kəşfiyyat sistemləri üçün daha təhlükəsiz sığınacaq yaradır.
Musavat.com
