Vaşinqton administrasiyası ABŞ-ın keçmiş prezidenti Barak Obamanın dövründə aparılan elmi tədqiqatın nəticələrinə yenidən baxacaq.
Musavat.com xəbər verir ki, məlumatı "The Wall Street Journal" (WSJ) mənbələrə istinadən yayıb.
Mənbələrə görə, bu, ABŞ Ətraf Mühitin Mühafizəsi Agentliyinin (EPA) 2009-cu ildə altı istixana qazının ictimai sağlamlığa ən böyük təhlükə yaratdığına dair nəticə əldə olunan tədqiqata aiddir.
Bu nəticə, EPA-nın iqlim tənzimləmələrinin əksəriyyəti üçün hüquqi əsas olub. Bu qaydalar elektrik stansiyalarından icazə verilən emissiyaları məhdudlaşdırıb və Təmiz Hava Qanununa əsasən nəqliyyat vasitələri üçün yanacaq qənaəti standartlarını sərtləşdirib.
Qəzetin məlumatına görə, Donald Tramp administrasiyası bu həftə nəqliyyat vasitələri üçün federal istixana qazı emissiyası standartlarının ölçülməsi, hesabat verilməsi, sertifikatlaşdırılması və tətbiqi tələblərini ləğv edən, eləcə də əlaqəli proqramları, kredit müddəalarını və sənaye miqyaslı öhdəlikləri yenidən nəzərdən keçirən bir sərəncam verməyi planlaşdırır.
WSJ-nin mənbələrinə görə, yeni qaydalar elektrik stansiyalarından, neft və qaz qurğularından və digər stasionar mənbələrdən emissiyalara təsir göstərməyəcək. Bununla belə, qeyd olunur ki, qarşıdan gələn dəyişikliklər gələcəkdə bu müəssisələrə də təsir edə bilər.
Xatırladaq ki, 20 yanvar 2025-ci ildə, vəzifəyə başladıqdan dərhal sonra Tramp ABŞ-ın Paris İqlim Sazişindən çıxması barədə sərəncam imzalayıb. 2015-ci il sazişinin şərtlərinə əsasən, 190-dan çox ölkə qlobal orta temperatur artımını sənayeləşmədən əvvəlki səviyyələrdən 1,5-2 dərəcə Selsi səviyyəsinə endirmək üçün qarşıdakı onilliklərdə karbon qazı tullantılarını könüllü olaraq azaltmağı öhdələrinə götürüblər.
Musavat.com
