Ukrayna Prezidenti Volodimir Zelenski bəyan edib ki, Kiyev NATO-ya üzvlük perspektivindən imtina etməyəcək.
Musavat.com xəbər verir ki, o, bu barədə çərşənbə axşamı jurnalistlərlə görüşü zamanı danışıb.
Zelenskinin sözlərinə görə, Ukraynanın NATO-ya qəbul edilib-edilməməsi alyans üzvlərinin qərarıdır, lakin Kiyevin öz mövqeyi artıq formalaşıb:
“Bu, tərəflərin razılaşmasıdır: Amerika, Ukrayna, Avropa və Rusiya. Bizim fikrimizcə, Ukraynanın NATO-ya qəbul olunub-olunmaması NATO üzvlərinin seçimidir. Amma bizim seçimimiz edilib”, – deyə o vurğulayıb.
Ukrayna lideri əlavə edib ki, bəzi tərəflər NATO ilə Rusiya arasında Ukraynanın gələcəyi ilə bağlı ayrıca razılaşmalar aparmaq istəyirlər:
“Məncə, bu ayrı danışıqlarda Ukraynanın NATO üzvlüyü məsələsi qaldırılacaq. Amma bu, kiminsə kimləsə razılaşmasıdır, bizim deyil. Və bu, Ukraynanın gələcəyi üçün çox vacib məsələdir”, – deyə Zelenski bildirib.
Musavat.com
