Son illər geniş yayılmış “axşam 18:00-dan sonra yemək olmaz” qaydası sağlam həyat tərzinin əsas prinsiplərindən biri kimi təqdim olunur.
Musavat.com xəbər verir ki, mütəxəssislər bu yanaşmanın hər kəs üçün uyğun olmadığını və bəzi hallarda beyin sağlamlığı üçün risk yarada biləcəyini bildirirlər. Araşdırmalara görə, uzunmüddətli aclıq və balanssız qidalanma orqanizmi mühüm qida maddələrindən məhrum edir.
Ekspertlərin fikrincə, xüsusilə vitamin B12, omeqa-3 yağ turşuları və dəmir çatışmazlığı yaddaşın zəifləməsinə, diqqət problemlərinə və zehni yorğunluğun artmasına səbəb ola bilər. Beyin əsas enerji mənbəyi kimi qlükozadan istifadə etdiyinə görə, uzun fasilələr qanda şəkərin enib-qalxmasına gətirib çıxarır ki, bu da konsentrasiya və əhval-ruhiyyəyə mənfi təsir göstərir.
Bundan əlavə, kəskin aclıq hissi yuxuya getməyi çətinləşdirir. Xroniki yuxu pozuntuları isə neyrodegenerativ proseslərin sürətlənməsi riskini artırır. Həkimlər bildirirlər ki, sərt və nəzarətsiz pəhrizlər uzunmüddətli perspektivdə beyin fəaliyyətinə zərər verə bilər.
Xüsusilə şəkərli diabetdən əziyyət çəkən şəxslər üçün uzun qida fasilələri təhlükəlidir. Qanda şəkərin kəskin dəyişməsi həm hipoglikemiya, həm də hiperglikemiya riskini yüksəldir.
Mütəxəssislər axşam saatlarında ağır və yağlı qidalar əvəzinə yüngül, zülal və faydalı yağlarla zəngin qidaların qəbulunu tövsiyə edirlər. Son yeməyin yatmazdan 2–3 saat əvvəl olması daha məqsədəuyğun hesab edilir.
Sonda qeyd olunur ki, hər bir qidalanma rejimi fərdi xüsusiyyətlərə uyğun tənzimlənməlidir və radikal qaydalar tətbiq edilməzdən əvvəl həkimlə məsləhətləşmək vacibdir.
Musavat.com
