Hələlik heç bir ölkə ABŞ-ın beynəlxalq sabitləşdirmə qüvvələrinin tərkibində Qəzza zolağına qoşunlarını yerləşdirmək təklifinə razılıq verməyib.
Musavat.com xəbər verir ki, məlumatı The Wall Street Journal (WSJ) mənbələrə istinadən yayıb. Nəşrin yazdığına gprə, bu həftənin əvvəlində Dövlət Departamenti sabitləşdirmə qüvvələrinə hərbi və ya maliyyə yardımı üçün 70-dən çox ölkəyə rəsmi olaraq sorğu göndərib. Hesabata görə, Vaşinqton "İtaliya və Fransa kimi yaxın müttəfiqlərlə yanaşı, Malta və El Salvador da daxil olmaqla kiçik ölkələrlə" də əlaqə saxlayıb. Mesajda qeyd olunur ki, Səudiyyə Ərəbistanı və BƏƏ də daxil olmaqla Yaxın Şərq ölkələri artıq ABŞ ilə Qəzzada sülhməramlı səylərin maliyyələşdirilməsi ilə bağlı danışıqlar aparır. Adı çəkilməyən ABŞ rəsmisinin sözlərinə görə, 19 ölkə qoşun göndərməkdə və ya digər dəstək göstərməkdə maraqlı olduğunu bildirib. Lakin The Wall Street Journal-ın qeyd etdiyinə görə, sabitləşdirmə qüvvəsinin mandatının HƏMAS hərəkatının yaraqlılarını tərksilah etməyə qədər genişləndirilməsi riski olduğundan, hələlik heç bir xarici ölkə öhdəlik götürməyib.
WSJ yazır ki, hətta Azərbaycan və İndoneziya - ABŞ rəsmilərinin fikrincə, "qoşun göndərməyə yaxın olan" iki ölkə - potensial silahlı toqquşmalarda iştirakı nəzərdə tutmayan məhdud hərbi səlahiyyətlərə üstünlük verirlər. Qəzet qeyd edir ki, Tramp administrasiyasının planlarına əsasən, təxminən 10.000 əsgər "Qəzzada müharibədən sonrakı sabitləşdirmə ilə məşğul olan" ABŞ generalının komandanlığı altında beynəlxalq qüvvələrin tərkibində olacaq. Lakin bir neçə ABŞ hərbi rəsmisi beynəlxalq missiyanın 8000 nəfərdən çox şəxsi heyətinin olacağına şübhə ilə yanaşır.
Mənbələr The Wall Street Journal-a bildiriblər ki, sabitləşdirmə qüvvələrinin tərkibi və vəzifələri gələn həftə Qətərdə müzakirə olunacaq və 25-dən çox ölkənin nümayəndələri iştirak edəcək. İsrail Baş naziri Benyamin Netanyahunun da dekabr ayında Trampla danışıqlar aparmaq üçün Florida ştatının Mayami şəhərinə gələcəyi gözlənilir.
Reuters əvvəllər ABŞ hakimiyyətinin Qəzza zolağında beynəlxalq sabitləşdirmə qüvvələrinin yerləşdirilməsi planı üzərində işləməyə başladığını bildirmişdi. Daha sonra The National qəzeti aydınlaşdırmışdı ki, həmin qüvvələrə Misir, Azərbaycan, Türkiyə və İndoneziyadan ən azı 4000 əsgər daxil olacaq. Onlar ağır silahlarla təchiz olunmayacaqlar. Onların mandatı sülhməramlı qüvvələrin mandatına yaxın olacaq. Beynəlxalq kontingentin səhra xəstəxanalarının yerləşdirilməsi və vacib infrastrukturun bərpası, eləcə də dağıntılar altından fələstinlilərin cəsədlərinin çıxarılması üçün axtarış-xilasetmə əməliyyatlarına nəzarət etməkdən ibarət olacağı gözlənilir. Bu əməliyyatlara 3000 yerli könüllü də cəlb olunacaq.
Musavat.com
