Rusiya ərazisindən uçan ABŞ-dən gələn naməlum təyyarənin Özbəkistan prezidenti Şavkat Mirziyoyevi gətirən təyyarə olduğu müəyyən edilib.
Musavat.com xəbər verir ki, bu barədə "FlightAware" xidməti məlumat yayıb.
Məlumatda bildirilir ki, təyyarə 19 fevral tarixində Vaşinqton yaxınlığındakı “Endryus” Hərbi Hava Qüvvələri Bazasından saat 14:12-də havaya qalxıb və 20 fevral saat 12:13-də Daşkənd hava limanına eniş edib. Reys yolu üzrə təyyarə əvvəlcə Qrenlandiyanın üzərindən, sonra isə Rusiyanın Murmansk və Orenburq bölgələrinin hava məkanından keçərək Qazaxıstan üzərinə daxil olub.
Əvvəlki məlumatlara görə, "Flightradar24" xidməti bu uçuşun "Boeing 787-8 Dreamliner" tipli təyyarə ilə həyata keçirildiyini bildirirdi.
Qeyd edək ki, Şavkat Mirziyoyev 17-19 fevral tarixlərində Vaşinqtonda olub və burada Qəzza Sülh Şurasının ilk iclasında iştirak edib. Tədbirlər başa çatdıqdan sonra o, ölkəsinə qayıdıb.
Musavat.com
