Bu gün AzTV-də canlı yayımlanacaq “Hədəf” verilişində region və dünya gündəmini silkələyən ən aktual məsələlər müzakirə olunur.
Musavat.com xəbər verir ki, verilişdə Yeni Müsavat Media qrupunun rəhbəri Rauf Arifoğlu, tanınmış jurnalist Elçin Alıoğlu, Hərbi ekspert Ədalət Verdiyev, Milli Məclisin deputatı Sevil Mikayılova iştirak edir.
Aparıcı Vəfa Seyidovanın təqdimatında baş tutan proqramda siyasi, hərbi və beynəlxalq münasibətlərə dair diqqətçəkən suallar cavablandırılır.
Verilişində bu gün region və dünya gündəmini silkələyən üç əsas mövzu geniş müzakirəyə çıxarılıb.
İlk mövzu Azərbaycanın Avropa Parlamenti ilə əlaqələri dayandırması ilə bağlıdır. Rəsmi Bakının bu addımı təsadüfi qərar kimi qiymətləndirilmir. Son dövrlərdə Avropa Parlamenti tərəfindən Azərbaycana qarşı qəbul edilən qətnamələr, tənqidlər və açıq siyasi təzyiq elementləri münasibətlərin gərginləşməsinə səbəb olub. Bu qərarın arxasında duran əsas faktorlar, Azərbaycanın suveren siyasətinə müdaxilə kimi qiymətləndirilən yanaşmalar və Qərb-Azərbaycan münasibətlərində yeni mərhələnin başlanıb-başlanmadığı sual altındadır. Eyni zamanda, rəsmi Bakının növbəti addımlarının hansı istiqamətdə olacağı – tam siyasi məsafə, yoxsa alternativ platformalar üzərindən əməkdaşlıq – əsas müzakirə predmetidir.
İkinci mövzu Ermənistanın mina xəritələrini və kütləvi məzarlıqların yerlərini açıqlamaması ilə bağlıdır. Bu məsələ təkcə siyasi yox, həm də humanitar böhran kimi qiymətləndirilir. Müharibədən sonra azad edilmiş ərazilərdə minatəmizləmə prosesinin ləngiməsi, mülki şəxslərin həyatına təhlükə və itkin düşənlərin taleyinin hələ də naməlum qalması ciddi narahatlıq doğurur. Ermənistanın bu məlumatları gizli saxlaması hansı məqsədlərə xidmət edir? Bu addım danışıqlarda təzyiq aləti kimi istifadə olunur, yoxsa məsuliyyətdən yayınma cəhdidir? Bu mövqenin regionda təhlükəsizlik balansına və etimad mühitinə təsiri də verilişdə dərin təhlil olunacaq.
Üçüncü müzakirə mövzusu isə ABŞ-da siyasi ritorikanın sərtləşməsi fonunda İranla bağlı mümkün hərbi ssenarilərdir. Xüsusilə Donald Trump-ın hakimiyyətə qayıtma ehtimalı və onun İranla bağlı sərt bəyanatları yeni riskləri gündəmə gətirir. Bu iddialar nə qədər realdır? ABŞ-İran qarşıdurmasının hərbi fazaya keçməsi ehtimalı varmı? Belə bir ssenari Yaxın Şərqdə və Cənubi Qafqazda hansı təhlükəli nəticələrə yol aça bilər? Enerji marşrutları, təhlükəsizlik balansı və regional güc mərkəzlərinin mövqeyi bu kontekstdə xüsusi diqqət mərkəzində olacaq.
Musavat.com
