Amerikalı aktrisa Şeron Stoun bir neçə il əvvəl öz evində hücuma məruz qaldığını etiraf edib.
O, hücum edənin kimliyini açıqlamaqdan imtina edib. 68 yaşlı aktrisanın sözlərinə görə, onu arxadan vurublar və nə baş verdiyini yalnız 10 il sonra həkim müayinəsinə gedərkən anlayıb.
“Özümə gəldiyimdə yerdə huşsuz halda uzanmışdım. İki divan kənara sürüşdürülmüşdü. Qəhvə masasının üzərində olan hər şey hər tərəfə səpələnmişdi və mən bunun necə baş verdiyini bilmirdim”, deyə Şeron Stoun bildirib.
Aktrisa boyun və çiyinlərinin arxa hissəsində ağrılar səbəbilə klinikaya müraciət edib. Həkimlər əvvəlcə həmin nahiyəyə artrit diaqnozu ilə iynə vurmağı planlaşdırıblar, lakin rentgen müayinəsindən sonra fikirlərini dəyişiblər.
“Sinə qəfəsinizdə çatlar və sağalmış çapıqlar var. Aydındır ki, sizə hücum edilib və baş verənlər ağır cinayətdir”, deyə həkim bildirib.
Stounun sözlərinə görə, ona şikayət vermək imkanı olsa da, hadisənin üstündən 10 il keçdiyi və o, ictimai şəxs olduğu üçün bunu etməyib.
Aktrisa həmçinin bildirib ki, cinayət işinin açılması üçün dolayı sübutlar kifayət qədər olub. Hadisənin məişət zorakılığı olub-olmaması ilə bağlı suala isə o, “bu barədə danışmaq hüququm yoxdur” deyə cavab verib.//Demokrat.az
