İranda kütləvi etirazlar və ümumxalq tətil dalğası davam edir, artıq ölkənin əksər şəhərlərini əhatə edib. Etirazların 11-ci günündə belə, hakimiyyətin sərt repressiyalarına baxmayaraq, aksiyalara tələbələr, ticarət işçiləri və zavod işçiləri qoşulub.
Musavat.com xəbər verir ki, Kermanşahda Azad Universitetinin tələbələri universitet ərazisində toplaşaraq “Tələbə ölür, amma təhqiri qəbul etmir” şüarı səsləndiriblər. Eyni zamanda Dizelabad və Məsadək meydanında ticarətçilər mağazalarını bağlayaraq küçələrə çıxıblar. Təhlükəsizlik qüvvələrinin gözyaşardıcı qazdan istifadə etdiyi, bəzi mənbələrin isə atəş açıldığı bildirilir. Etirazçılar ilə təhlükəsizlik qüvvələri arasında şiddətli qarşıdurmalar baş verib, aksiyalarda “Ölüm diktatora” şüarları səslənib.
Təbriz, Şiraz, Kermanşah, Kazvin və digər şəhərlərdə ticarətçilər, zavod və müəssisə işçiləri genişmiqyaslı tətil elan edərək iş yerlərini bağlayıblar və küçələrə çıxıblar. Etirazlar sürətlə sosial qruplar arasında yayılar və təhlükəsizlik qüvvələri ilə qarşıdurmalar davam edir.
Eyni zamanda hakimiyyət etirazları yatırmaq üçün təzyiqi gücləndirib. İlam vilayətinə İran İnqilab Keşikçiləri Korpusunun bölmələri göndərilib. Yerli mənbələr bildirir ki, Təhrandan təxminən 100 xüsusi avtomobildən ibarət kolonna hərəkət edib; bu maşınlar DŞK pulemyotları və avtomatik silahlarla təchiz olunub.
Dizelabaddan gələn xəbərlərə görə, rejim aksiyaları yatırmaq üçün atəş açmaq və zorakılıq tədbirləri həyata keçirsə də, etirazlar və tətil aksiyaları davam edir, daha çox şəhər və sosial qrupları əhatə edir.
Musavat.com
