Ermənistanda hakimiyyət yeni mövzunun üstünə düşüb: gənclərin xaricdə təhsili və bunun ordu çağırışından yayınmaq üçün istifadə edilməsi.
Musavat.com xəbər verir ki, müzakirələrə səbəb olan məlumatı həm təhsil naziri, həm də parlament üzvləri yerli parlamentin iclasında açıqlayıb.
Təhsil naziri Janna Andreasyan bildirib ki, Ermənistan gələcəkdə xaricdə təhsil alan bəzi vətəndaşları hərbi xidmətdən tam azad edə bilər. Şərt odur ki, həmin şəxslər dünyanın ən nüfuzlu universitetlərindən birini bitirdikdən sonra ölkəyə qayıdıb azı üç il dövlətin müəyyən etdiyi sahələrdə işləsinlər. Söhbət Şanxay reytinqinin ilk beşliyindən gedir - yəni faktiki olaraq ABŞ və Britaniya universitetlərindən.
Əsl məsələ isə statistikalarda üzə çıxıb. Nazir bildirib ki, 2018-ci ildən bəri bu imkandan 650 nəfər istifadə edib. Onların 57-si artıq təhsili başa vurub, amma ölkəyə qayıdanların sayı barmaqla sayılacaq qədərdir. Cəmi bir nəfər orduda xidmət edib. Dördü elmi fəaliyyətə keçib. 12 nəfər barəsində “axtarış” qərarı var. 40 nəfər isə heç bir əsas göstərmədən sadəcə yoxa çıxıb. Faktiki olaraq hərbi xidmətdən yayınma mexanizminin hüquqi çərçivədən “miqrasiya çıxışına” çevrildiyi ortaya çıxır.
Hakim partiyanın deputatı Ayk Sarkisyan isə məsələni daha da kəskinləşdirib. Onun sözlərinə görə, hökumət uzun illər boyu xaricdə təhsil alanlarla bağlı heç bir uçot aparmayıb. Yəni dövlət gənclərə 3–4 il təhsil üçün güzəşt verir, amma həmin şəxslər ölkəyə qayıdırmı, orduya gedirmi, yoxsa sadəcə “gözə batmadan yox olurmu” — bunu heç kim bilmir.
Sarkisyan statistika da açıqlayıb. Ermənistanda tələbələrin 57%-i qızdır, lakin xaricə gedənlərin əksəriyyəti oğlanlardır. 2004–2023-cü illərdə sərhəddən kənara təhsil üçün gedənlərin 2265-i oğlan, 1191-i isə qız olub. Deputatın nəticəsi açıq idi: xaricdə təhsil həm sosial lift, həm də “ordu biletidir”. Başqa sözlə, Ermənistanın kişi əhalisinin mühüm hissəsi Ermənistan ordusunu özünə alternativ hesab etmir.
Musavat.com
